Şirnex– Şîrketên bazirganiyê li çiyayên Cûdî û Gabar ji bo derxistina komir û petrolê her roj dînamîtan diteqînin û xwezayê wêran dikin. Hevserokê Şaxa Odeya Endezyarên Erdnasiyê ya Amedê Ozgur Haktan Bozan diyar kir ku teqandina dînamîtan zerarek zêde dide zîndiyan.
Di 10 salên dawî talankirina xwezaya Kurdistanê zêde bûye. Hikûmet her roj ji bo avakirina bendavan, vekirina kanên komirê, kolandina bîrên petrolê, birîna daran, qanûnên ku destûrê dide derdixin. Bi taybetî jî li ser navend û navçeyên Şirnexê polîtîkayek cuda tê meşandin. Di serdema hikûmeta AKPê de qanûnên ku li ser daxwaza şîrketên bazirganiyê tên guhertin zêde bûne. Ev qanûn bêtir zerarê didin xwezayê û rê li talankirinê vedikin. Ji ber vê yekê lêgerîna petrol û vekirina kanên madenê zêde bûye. Ev jî zerarek zêde dide xwezayê. Li Şirnexê jî di salên dawî de herî zêde xweza bi teqandina dînamîtan zerarê dibîne.
Li Geliyê Hirça her roj dînamîtan diteqînin
Bi taybetî li Çiyayê Cûdî di kanên komirê de û li Çiyayê Gabar di vekirina bîrên petrolê de teqandina dînamîtan zêde bûye. Her roj li van herdu çiyayan dînamît tên teqandin. Di demên dawî de bi taybetî li Herêma Geliyê Hirça ya Çiyayê Cûdî teqandina dînamîtan zêde bûye. Ev zerarek zêde dide xweza û zîndîwerên herêmê.
Dînamît zerareke mezin dide xwezayê
Hevserokê Şaxa Odeya Endezyarên Erdnasiyê ya Amedê Ozgur Haktan Bozan anî ziman ku dînamît zerarek zêde dide xwezayê got: “Helbet mirov ji xwezayê sûd werdigire lê divê ev sûdgirtin bi awayekî zanebûn were kirin. Divê rê li pêşiya zerarê bê girtin. Piştî kûratiyeke binerdî çavkaniyên avê zerarê ji dînamîtan dibînin. Her wiha zîndîwerên di xwezayê de dijîn jî zerarek mezin dibînin.”
Nezanî û tima zerarê dide xwezayê
Ozgur Haktan Bozan diyar kir ku ji bo teqandîna dînamîtan zerarê nede divê kesên pispor werin xebitandin û axaftina xwe wiha bi dawî kir; “Dema dînamît ji aliyê kesên nezan ve bên bikaranîn zerarek gelek mezin derdikeve holê. Helbet carna hewce dike dînamît bên bikaranîn. Lê divê ev yek di bin kontrola pisporên vî karî de were kirin. Tişta ku îro li Tirkiye û Kurdistanê xuya dike berojavî vê yekê ye. Dema em derxistina madenên binerd dinêrin xuya dike ku ev kar ne karê pisporan e û bi awayek nezanî ev teqandina dînamîtan pêk tê.”
