Şirnex- Li parqên Cizîrê bekçiyên ku bi keleşan digerin bandorek neyînî li ser derûniya malbat û zarokan dikin.
Li bajarên Kurdistanê ji bo “ewlehiya gel” bi deh hezaran bekçî hatine erkdarkirin. Di salên dawî de ji aliyê dewletê ve ji bo bekçiyan gelek qanûn hatin derxistin û êdî bekçî jî weke polis û leşkeran dikarin çekan bikar bînin û bêyî ku destûrê bigirin welatiyan rawestînin û li ser bedena wan lêgerînê bikin.
Bekçî jî êrîşî sivîlan dikin
Di gelek buyerên ku polîs êrîşî çalakiyên saziyên sivîl dikin de, bekçî jî ligel polîsan êrîşî girseyê dikin. Li navçeya Cizîrê ya Şirnexê beriya 2 mehan bekçiyan êrîşî ciwanan kiribû. Dema gel bertek nîşan dabû, bekçiyan çekên xwe li parqên ku bi hezaran welatî lê bêhna xwe didin, bikar anînbûn. Piştî êrîşa bekçiyan 4 ciwan hatibûn binçavkirin. Li gelek bajarên Kurdistanê jî heman bûyer pêş dikevin.
Li parqan bi keleşan digerin
Bekçiyên ku qaşo ji bo ewlehiya parqên Cizîrê hatine peywirdarkirin bi keleşan di nav parqan de digerin. Ev yek metirsiyeka welatiyan zêde dike. Bi taybetî parqa Îsmaîl Ebûlîz El-Cizîrî ji bo gelê Cizîrê weke deverek a bêhnvedanê ye û her şev bi sedan malbat tên li vê parqê rûdinin. Zarokên ku bi malbatên xwe re tên parqê dileyîzin. Bekçiyên li vê parqê radiwestin bêyî ku bifikirin çek bandorek çawa li ser zarokan dike, bi çekên xwe li cihê zarok lê dileyîzin diçin û tên. Gelek zarokên van çekan dibînin ditirsin û dev ji leyîstinê berdidin, diçin ba malbatên xwe.
Zarok nikarin ji ber bekçiyan bileyîzin
Welatiyên ku tên parqê bertek nîşanî vê yekê dan lê ji ber ewlehiyê nexwestin ji qemereya me re biaxivin. Welatiyan da zanîn ku bekçiyên li van parqan hatine peywirdarkirin gelek ji wan berê diz, ereqvexwir û tiryakêş bûne, lê îro bi çekan li van parqan digerin. Welatiyan anîn ziman ku ew gelek caran ji ber bekçiyan nikarin rehet tevbigerin û zarokên wan dema bekçiyan dibînin dev ji leyîstinê berdidin û nikarin li parkê bilîzin.
