Kurdistanî û dostên Kurdan çalakiya rûniştinê ya ji bo azadiya fîzîkî ya Rêberê Gelê Kurd Abdullah Ocalan û naskirina ‘Mafê Hêviyê’ ku li pêş Konseya Ewropayê dest pê kirine didomînin.
Kurd û dostên Kurdan 2 rojin ji bo Konseya Ewropa zextan li Tirkiyeyê bike da ku Mafê Hêviyê ya Rêberê Gelê Kurd Abdullah Ocalan pêk bîne, çalakiya rûniştinê li dar dixin. Civîna Komîteya Wezîran a Konseya Ewropayê didome. Çalakiya rûniştê ya ku Kurdistanî û dostên wan li ber avahiya Konseya Ewropayê daye destpêkirin di roja xwe ya duyemîn de didome. Çalakvan îro çalakiya xwe bi berzkirina dirûşmeyên ‘Bijî Serok Apo’ û ‘Jin Jiyan Azadî’ û gerandina govendê berdewam kirin.
Di çalakiyê de ji bo bîranîna 3yemîn salvegera Jîna Emînî ya ku ji aliyê dewleta Îranê ve hatibû kuştin û serhildana ‘Jin Jiyan Azadî’ rêzeçalakî hatin lidarxistin. Piştre Daxuyaniya TJK-E’yê ku bi çend zimanan hatibû amade kirin hat xwendin.
Komîteya Amadekar, diyar kir ku ew bi armanca azadiya Rêbertî di çalakiyê de ne û hat gotin ku dê hefteyek ev çalakî bidome.
Li ser navê TJK-E Kezban Dogan axivî û Jin Emînî û kesên ku di têkoşîna jinan de jiyana xwe ji dest dane bi bîr anî. Kezban Dogan gotina Rêber Apo ya “Hêvî ji serketinê mezintir e’ bibîr anî û destnîşan kir ku “Jin Jiyan Azadî” ne tenê gotin, di heman demê de ew helwesteke ku bi ked, fedakarî û jinû ve avakirina jinê derketiye holê. Kezban Dogan, diyar kir ku “mafê hêviyê” yê ku di qanûnên tevahiya hêzên serdest de cih digire, ji bo Rêber Apo nayê naskirin û got ku jin dê ji bo vî mafî têkoşînê bidomînin.
Çalakî bi dirûşmeya “Jin Jiyan Azadî” bi dawî bû. Ayşe Acar Başaran jî di çarçoveya çalakiyên li ber Konseya Ewropayê de semînerek da.
