Nûnertiya Swîsreyê ya IPPNW ku Xelata Aştiyê ya Nobelê wergirtiye, ji bo ‘Mafê Hêviyê’ bang li Konseya Ewropayê kir û xwest zextan li Tirkiyeyê bikin da ku Mafê Hêviyê pêk bîne.
Yekîtiya Navneteweyî ya Doktorên Pêşîgirtina li Şerê Nukleerî (IPPNW) di sala 1985an Xelata Aştiyê ya Nobelê wergirt. Li gorî nûçeya ANFê; Serokê nûnertiya Swîsreyê yê IPPNWê Dr. Beppe Savary-Biroli û nûnerên saziyê Marianne Kursteiner li ser ‘Mafê hêviyê’ nameyek ji Wezîrê Karên Derve yê Swîsreyê Ignazio Cassis, endamên Komîteya Wezîran a Konseya Ewropayê û Nûnera Daîmî ya Konseya Ewropayê ya Swîsreyê Claude Wild re şand. Di nameyê de ji ber ku Tirkiye biryarên Dadgeha Mafên Mirovan a Ewropayê (DMME) bi cih nîne fikarên xwe anîn ziman û bal kişandin ser girîngiya azadiya Rêberê Gelê Kurd Abdullah Ocalan.
Name bi vî rengî ye:
“Bi navê beşa Swîsreyê ya Yekîtiya Navneteweyî ya Doktorên Pêşîgirtina li Şerê Nukleerê (IPPNW) ku sala 1985’an Xelata Aştiyê ya Nobelê wergirtiye, em dixwazin ragihînin ku gelekî bi fikar in; ji ber ku Tirkiye têkildarî cezayê girtîgehê yê heta bi hetayê yê girankirî bi bi taybetî jî yê di doza Abdullah Ocalan de, biryarên Dadgeha Mafên Mirovan a Ewropayê (DMME) bi israr bi cih nîne.
Tirkiye sosên xwe binpê dike
Dadgehê di sala 2014’an de hikumet dabû ku cezayê girtîgehê yê heta bi hetayê yê girankirî eger ji derfeta jinûve nirxandinê bêpar be, ev yek binpêkirina xala 3’emîn a Peymana Mafên Mirovan a Ewropayê ye. Komîteya Wezîran di Îlona 2024’an de salek dem dabû Tirkiyeyê ku van biryaran bi cih bîne û guhertinên qanûnî yên pêwîst bike. Lê belê hikumeta Tirk di daxuyaniya xwe ya herî dawî de ragihand ku ew bicihanîna ‘Mafê Hêviyê’ red dike ku ev yek ji bo dewleteke endamê Konseya Ewropayê tê wateya binpêkirina sozên ku dane.
Hêviya Rojhilata Navîn e
Her wiha em dixwazin destnîşan bikin ku Birêz Abdullah Ocalan beriya demeke kurt ji bo bidawîkirina şerê gerîla bangeke dîrokî kir, fesixkirina PKK’ê ragihand û pêşniyara aştiyê li Tirkiyeyê kir. Berdana wî dikare pêvajoyeke welê li Rojhilata Navîn bide destpêkirin ku dişibe dînamîka lihevkirinê û hêviyê ya weke berdana Nelson Mandela ya li Efrîkaya Başûr.
Ji ber vê yekê em bang li Komîteya Wezîran dikin ku hemû tedbîrên pêwîst werbigire, ji bo Tirkiyeyê neçar bihêle ku biryaran bi cih bîne. Ev mesele ne tenê ji bo mafên mirovan ên mehkûman di heman demê de pêwendiya vê meseleyê bi yekparebûn û baweriya bi sazî û Konseya Ewropayê jî heye.
Bi lez mafê hêviyê pêk bînin
Em doktor bi taybetî aliyê mirovî destnîşan dikin: Tecrîd û bêhêvîtiya bi dehan salan şêweyekî kiryara li dijî mirovahiyê bû rehm e. Divê tavilê bê bidawîkirin.
Ji ber vê yekê em bi rêzdarî ji we dixwazin; ji bo Tirkiye bi taybetî di bûyera Abdullah Ocalan de tavilê ‘Mafê Hêviyê’ bi cih bîne, rewşa wî ya girtîbûnê di ber çavan re derbas bike û şert û mercên berdana wî biafirîne, bi biryardarî tevbigerin.”
