Şirnex- Parlamentera Şirnexê Newroz Ûysal bang li gel kir ku tev li çalakiya herêma Bestayê bibin û got: “Bi xwedî derketina xwezayê mirov dikare civak û axek azad ava bike.”
Li ser xwezaya Kurdistanê bi salan e, bi awayek sistematik û bi şerê taybet talanek pêk tê. Ev talana şerê taybet di salên dawî de bi taybetî li ser xwezaya Botanê berdewam dike. Ji çêkirina santralên termîkê bigire, heya bendavên ji bo ewlehiyê, ji vekirina kanên komirê heya lêgerîna bi dînamîtan ya petrolê, ji derxistina şewata daristanan heya birîna daristanan a bi destê dewlet û cerdevanan, ji çar aliyan ve xwezaya Şirnex bûye hedefa dewletê. Li dijî vê talanê gelê Şirnex dê 9 û 10ê Îlonê de bi meş û nobeta li Herêma Besta bertek nîşanî hewldanên talankirinê bidin. Parlementera DEM Partiyê ya Şirnexê Newroz Ûysal Aslan derbarê talana xwezaya Şirnexê de ji ajansa me (AW) re axivî û got: “Encax bi xwedî derketina xwezaya xwe mirov dikare civak û axek azad ava bike.
Bi talana xwezayê dixwazin Kurdistanê vale bikin
Ûysal diyar kir ku armanca dewleta tirk bi talanê valekirina Kurdistanê ye û wiha axivî: “Nêzîkatiya talana xwezayê li hemû cîhanê bi destê polîtîkayên kapîtalîst pêk tê. Heman polîtîka li Tirkiyeyê jî tê meşandin. Li hemû bajarên Tirkiyeyê bi destê şîrketên rantê ev yek pêk tê. Talana li Kurdistanê ji ya her derê cudatir e. Ji ber ku nêzîkatiya bajarên Kurdan tenê ne rant e. Dema li Kurdistanê talanê dike, dibêje ez ê Kurdistanê çawa bêmirov, bêkes bihêlim.”
Xîzanî û koçberiya gel ji ber talana xwezayê ye
Newroz Ûysal da zanîn ku dewlet bi talana xwezayê derdikeve derveyî qanûnan û axaftina xwe wiha berdewam kir: “Li Kurdistanê ji salên 1980ê pêde dest bi bendavên ewlehiyê kirin. Îro xizaniya gelê me, koçberiya gelê me bi vê talanê ve girêdayî ye. Ev talan bi kanên komirê destpê kir, îro bi derxistina petrolê, lêgerîna madenên cuda, dar birînê berdewam dike. Dema talan dikin jî hemû qanûnên parastina xwezayê binpê dikin.”
Qirqirina xwezaya Kurdistanê bi şerê taybet ve girêdayî ye
Newroz Ûysal destnîşan kir ku bi talana xwezayê re encamên gelek neyînî herêmê derdikevin holê û wiha dirêjî da axaftina xwe; “Di xwezaya Kurdistanê de qirkirinek heye û ev qirkirin bi şerê taybet ve girêdayî ye. Gelê Kurd bi xwezaya xwe ve girêdayî ye, Lê ji bo parastina xwezayê çi hewce bike divê mirov pêk bîne. Her mudaxaleya mirov li ser xwezayê pêk tîne bi xwe re encameke derdixe holê. Îro encamên vê yekê li Silopya zêdebûna nexweşiya penceşêrê ye. Li gelek gundên Şirnex êdî çandinî nayê kirin. Ji ber mudaxaleya xwezayê çandinî têk diçe.”
‘Em ê bi çalakiyan xwezayê biparêzin’
Newroz Ûysal herî dawî bang li gele Botanê kir û xwest bi girseyî xwedî li xwezayê derkevin got: “Ev demeke dirêj e, di aliyê talana xwezayê de hişmendiyek bertek dayînê derketiye holê. Divê ev hişmendî berfirehtir bibe. Ji ber ku encax bi xwedî derketina xwezayê mirov dikare civakeke azad ava bike. Axeke azad ava bikin. Gelê me çiqas piştgiriyê bide xebatên li dijî talana xwezayê wê parastina xwezayê jî ewqas pêtir pêk bê. Em hemû gele xwe vedixwînin xwedî derketinek bi girseyî ya li dijî talana xwezayê.”
