Şaredariya Rezan a Amedê bi dirûşmeya “Modela Butçeya Beşdar a Rezan” cara yekem raste rast gel tev li proje û bernameyên xizmetê kir.
Li navçeya Rezan a Amedê gaveke dîrokî hate avêtin. Bi “Modela Bûtçeya Beşdar a Rezan” a Şaredariya Rezanê, gel cara yekem rasterast xizmet û projeyên ku li taxan bêne kirin bi xwe diyar kir. Ev model ku li Tirkiyeyê di asta şaredariyeke navçeyê de cara yekem hate pêkanîn, mînakeke bihêz a demokrasiya herêmî derxist holê.
Ya Esas Îradeya Gel e
Di pêvajoya ku bi perspektîfa rêveberiyên herêmî yên demokratîk hate amadekirin de, wekî herêma pilot taxên Bagcilar û Kaynartepe hatin hilbijartin. Yekîneya Bûtçeya Beşdar a ku ji 5 kesan pêk tê bi awayekî fermî hate avakirin, 45 kes tîmên qadê û li her taxê dora 20 nûnerên taxan hatin diyarkirin. Rêxistinên civaka sivîl, odeyên pîşeyî û yekîneyên şaredariyê jî tevlî vê pêvajoyê bûn. Bi vî awayî ne tenê şaredarî, hemû hêzên bajêr jî tevlî bûn. Ev sazî û rêxistinên bajêr wek hevkar, nûner tayîn kirin û pişt dane vê xebatê . Her kes û nûner bi perwerdeyeke berfireh ji bo xebatê hatine amadekirin. Derheq pêvajoyê de tevlî atolyeyan bûn.
Bi civînan daxwaz hatin diyarkirin
Li her du taxan li her yekê 4 civîn bi gavên cuda cuda hatin lidarxistin. Di civînên yekem de modela bûtçeya beşdar hate nasandin. Di civînên duyem de gel derket kûrsiya azad û daxwazên xwe anî ziman. Di civînên sêyem de jî ev daxwaz hatin nîqaşkirin û pêşiyên hevpar hatin diyar kirin.
Di encamê de li Bagcilarê 15 proje û li Kaynartepe 13 proje ji bo dengdanê ji gel re hatin pêşkêşkirin.
Demokrasî bi sindoq û dengdana tîjîtal
Welatî hem li sindoqên ku li taxan hatin danîn û hem jî di platformên dîjîtal de dengên xwe bi kar anîn. Dengdanê ku li her taxekê hefteyekê dom kir, eleqeyeke mezin dît. Bi giştî li Bagcilarê 7 hezar û li Kaynartepe 4 hezar û 800 deng hatin bikaranîn.Di encama hilbijartina de li her taxekê sê proje hatin bijartin.
Sê projeyên ku li Bagcilarê ji aliyê gel ve hatin hilbijartin:
- Hewza Avjeniyê
- Pirtûkxane
- Park
Li Kaynartepe jî:
- Navenda Têkoşîna li Dijî Tiryakiyê
- Pirtûkxane
- Parka Lîstikan
Gotinên welatiyekî ev coş bi kurtî anî ziman: “Cara yekeme me ji bo taxa xwe biryar da, ev ji bo me şanaziyek e.”
Bi gel re wê bê avakirin
Projeyên hatin hilbijartin wê di plana xizmetê ya sala 2026an de cih bigirin û bi beşdariya gel werin avakirin. Li taxan komên xebatê yên kolektîf ên ji welatiyên dilxwaz werin avakirin wê hevkar û şopînerên projeyan bin. Bi vî awayî gel ne tenê di qonaxa biryargirtinê de, di pêvajoya sepandinê de jî wê xwedî gotin û îrade be.
Çanda demokrasiya beşdar
Ji bo ku jin, ciwan, kal û berasteng bi awayekî çalak tevlî vê pêvajoyê bibin, rêbazên wekî dengdana dîjîtal, sepana QR kodê, civînên li qadan û kûrsiya azad hatin pêşxistin. Bi vê aliyê xwe ve Modela Rezanê, têgihiştineke demokratîk a tevlîkar jî xurt kir.
Mînakeke dîrokî ji bo demokrasiyê
Pêvajoya ku bi dirûşma “Bajarê te ye, bûtçeya te ye , biryara te ye” hate meşandin, ne tenê xebateke bûtçeyê ye, di heman demê de avakirina çandeke nû ya demokrasiya herêmî jî ye. Ev gavên ku bi îradeya gel hatin avêtin , li Rezanê bûn pratîka rêveberiya demokratîk.
