Amed – Xizmên Windayan, Rêxistina DEM Partiyê ya Amedê û nûnerên Şaxa Komeleya Mafên Mirovan (ÎHD) ya Amedê ji bo winda bên dîtin û kujer werin darizandin li pêş Bîrdariya Mafê Jiyanê ya Parka Koşuyolu ya Amedê di hefteya 865an de çalakiya xwe berdewam kirin.
Serokê Komeleya Mafê Mirovan (ÎHD) a Amedê Ercan Yilmaz diyar kir ku dema Mehmet Sîncar ji bo bûyerên bi faîlê wan nediyar lêkolîn bike bi şandeyekê ve çûne Êlihê, hatiye qetilkirin û anî ziman ku ji bo peydakirina faîlên wan, heya niha tu lêpirsînên bibandor nehatine kirin.
Hevjîna Mehmet Sîncar Cîhan Sîncar kesên di têkoşîna aştî û azadiyê de jiyana xwe ji dest dane bi bîr anî û anî ziman ku Mehmet Sîncar tevî ku endamê Meclisê bû, Meclisê heya niha aqûbeta Mehmet Sîncar nepisî û wiha got: “Mehmet Sîncar ji bo edaletê lêkolîn bike çû. Lê belê yên ku demokrasî û edaletê nedixwestin wî jî qetil kirin. Mehmet Sîncar, bi hezaran in, bi milyonan in. Em ê li ber xwe bidin û bibin layîqê wan”
Hevseroka DEM Partiyê Gulşen Ozer anî ziman ku ew şahidên rojên ku mirov dihatin qetilkirin in û wiha got: “Em ê wan ji bîr nekin, dê li pey doza wan bin. Ji bo werin tirsandin û dest ji doza bitirsin hatin kuştin. Bi sedan çûn bi hezaran hatin, bi mîlyonan hatin.” Gulşen Ozer bal kişand rol û mîsyona Rêberê Gelê Kurd Abdullah Ocalan û ev tişt gotin: “Birêz Ocalan got ku me dengê xwe da hemû dinyayê. Me xwe da naskirin û îro jî şer didin sekinandin. Em çekên xwe datînin edî em bi sîyasetê bi rêya aştiyê li hev tên.”
Di çalakiya vê hefteyê de çîroka Mehmet Sîncar ê di 4ê Îlona 1993yan li Kolana Elma ya Êlihê ji hêla JÎTEM û Hîzbûllahê ve hatibû qetilkirin hate xwendin. Çîrok ji hêla Yahya Polat ve hat xwendin. Piştî xwendina çîrokê, çalakî bi deqeyeke çalakiya rûniştinê, bi dawî bû.
