Nivîskarê Kurd Rênas Jiyan vê carê jî romanek nû ya bi navê “Stêrk Dibişkivîn Li Zêrzewanê” çap kir û pirtûk li ber destê xwîneran e.
Romannûs û helbestkarê Kurd Rênas Jiyan ku bi roman, helbest, çîrok û wêjeyê ên dewlemend tê zanîn pirtûkek nû nivîsand. Pirtûka Rênas Jiyan a bi navê “Stêrk Dibişkivîn Li Zêrzewanê” ya ji cureya romanê ji Weşanxaneya Belkî derçû.
Rênas Jiyan li hesabê xwe yê medya dîjîtal danasîna pirtûka xwe kir û got ku ew bi pirtûkek nû bi xwînerên xwe re ye. Xwîner dikarin pirtûkê ji Weşanên Belkî û pirtûkxaneyên Kurdî peyda bikin.
Rênas Jiyan naveroka pirtûkê wiha vegotiye:
“Gava wek niha dibû zivistan û bayê kur dihat Tîtal û zarokên din diçûn talda wan lodan, pişta xwe dispartin pûş, diketin qulên pûş, wiha germ bû, wiha ewle bû, wek mirov ji xwe re di dawa diya xwe de be eyn. Lodan ew hembêz dikirin. Bîna pûş pir xweş bû. Lodan ew diparastin. Lod dê bûn, lod mal bûn, lod welat bûn, lod stêrkên dûr bûn, lod Rêya Kadizan bûn… Di qulên pûş de Tîtal û hevalên xwe wek cewrikan serê xwe dixist ber hev û ji xwe re dipeyivîn, qala fîlman dikirin, fîlmê Tarzan, qala medreseya xwe dikirin, dersên xwe yên medresê dubare dikirin: ‘Elîf fethîten en, qesrîten în, zemîten ûûûn…’ Qala berfê dikirin, qala reşêleyan dikirin, qala cinan dikirin: ‘Kuro, nebê cin!? Bêje ‘ji-me-çêtir!’ Tîtal tayekî pûş dicût, serê wî li ser sînga pûş dihênijî. Qulika lodê, malika wan, pir xweş bû, ji hemû qesran jî xweştir, ev der bihuşt bû, li vir xerabî tune bû.”
Rênas Jiyan heta niha gelek pirtûkên ji cureyên wek roman, çîrok, helbest û wêje nivîsandin e.
Pirtûkên din ên nivîskar ev in:
* Janya (helbest) 1999
* Koleksiyona Çirûskan/Mexzena Xwînê (helbest) 2003
* Di Tuwaletê De (şano) 2006
* Ji Şevê Re Çend Têgehên Dera Hanê (ceribîn-rexne) 2008
* Çirûskîzm: Li Ser Goşt û Agir û Hunerê Lêkolîneke Fenomenolojîk (teorî-felsefe) 2012
* Diêşiya (helbest) 2013
* Wêjeya Kurmancî: Pênûsên Çardederb (analîza wêjeyî û daberhevî) 2015
* Spîtama (roman) 2016
* Ponijîn (raman) 2016
* Dîn û Şîn (helbest) 2016
* Bacanên Pelçiqî (roman) 2017
* Stranên Sor Niviştên Mor (roman) 2018
* Bîna Petêxan ji Hêsirên Min Tê (kurteçîrok) 2019
* Berfwerîn (helbest) 2020
* Kavirên Anarşîst (roman) 2021
* Em Ketin Peyvê Me Xwe Ji Bîr Kir (hevpeyvîn) 2022
* Êvar Încas in Şev Kersele (helbest) 2023
* Stêrk Dibişkivîn li Zêrzewanê (roman) 2025
