Meclisa Şaredariya Fabriano hemwelatîbûna rûmetê da Pexşan Ezîzî, Şerîfe Mihemedî û Werîşe Muradî.
Endama Meclisa Şaredariya Fabriano ya Îtalyayê Marta Ricciuti bi peyamekê ragihand ku hemwelatîbûna rûmetê dane girtiyên siyasî yên li ber cezayê darvekirinê Pexşan Ezîzî, Şerîfe Mihemedî û Werîşe Muradî. Marta Riciuti diyar kir ku şaredariyê ev biryar ji bo rêzgirtina li têkoşîna jinan a ji bo mafên sivîl û edaleta civakî girtiye. Biryar piştî pêşniyara Komîsyona Wekheviya Jin-Mêr (Zayendî) bi yekdengî hatiye pejirandin.
Marta Ricciuti di peyama xwe ya li ser hesabê xwe yê medyaya dîjîtal parvekirî de wiha ragihand: “Di parlamentoya me de bi yekdengî dayîna hemwelatîbûna rûmetê ji bo Pexşan Ezîzî, Şerîfe Mihemedî û Werîşe Murad pejirand. Ev jin ji ber çalakiyên wan ên aştiyane yên ji bo parastina mafên jinan û karkeran bi cezayê darvekirinê hatine cezakirin.”
Marta Ricciuti destnîşan kir ku biryara dayîna hemwelatîbûna rûmetê ne tenê jestek sembolîke, di heman demê de rêyeke ku dengê kesên ku ji bo azadî û rûmeta mirovan têdikoşin bigihîne cîhanê ye.
Endama Meclisa Şaredariya Fabriano ya Îtalyayê Marta Ricciuti diyar kir ku armanca vê gavê ewe ku ji bo rawestandina darvekirinan zexta navneteweyî zêde bike û rayedarên Îranê neçar bike ku biryarên xwe biguherin. Marta Ricciuti wiha got: “Azadiya raman û îfadeyê ne tenê mafeke, di heman demê de amûrek bihêz a berxwedan û hevgirtinê ye. Bêdengî cûrek yê hevkariyê ye.”
Hêjayî bibîrxistinê ye roja 16ê Tebaxê cezayê darvekirinê yê Şerîfe Mihemedî ya li girtîgeha Lakan a bajarê Reşt ji aliyê Şaxa 39 a dadgeha bilind ya Îranê ve bi temamî hat erêkirin. Her wiha roja 8ê Çileya 2025an ji aliyê dadgeha bilind ya Îranê ve cezayê Pexşan Ezîzî û roja 10ê Mijdara 2024an ve jî cezayê darvekirinê yê Werîşe Muradî bi temamî hatine erêkirin. Ji ber vê çendê metirsiya bicihanîna cezayê darvekirinê li ser her sê girtiyên siyasî heye.
