Civîna Komîsyona Meclîsê ya 7an bi guhdarkirina serokên berê yên meclîsê bi dawî bû.
Komîsyona Demokrasî, Xwişk-Biratî û Hevgirtina Mîllî ku di çerçoveya pêvajoya Aştî û Civaka Demokratîk de li meclîsê hatibû avakirin civîna xwe ya 7emîn li dar xist. Di civîna 7an a komîsyonê de serokên berê yên meclîsê hatin guhdarkirin.
Di rûniştina 2an a civînê de destpêke Cemîl Çîçek axivî. Cemîl Çîçek bi lêv kir ku pirsgirêka wan a baweriyê heye û ev tişt gotin: “Divê em pirsgirêkên biçûk tespît bikin û li çareseriya wan bigerin. Yanî pêşiyê bi yên biçûk destpê bikin. Ji bo pêvajoyê çi bikeve li ser min ez amade me pêk bînim.”
Piştre Îsmet Yilmaz axivî. Îsmet Yilmaz jî destnîşan kir ku divê ne zimanekî li dijitî lê zimanekî xizmeta pêvajoyê bike bê bikaranîn.
Îsmaîl Kahraman jî bi bîr xist ku di Newroza 2013an de piştî peyama Abdullah Ocalan ji aliye Sirri Sureyya Onder ve hat xwendin li tevahî welat hewayeke aramî belav bû û niha jî firsendeke heye û got ku ew jî piştgiriyê dide pêvajoye.
Bînalî Yildirim jî anî ziman ku xurt kirina rêveberiyên herêmî ji bo pergala dewletê ya unîter ne gef e û got: “Ew pergal weke navendîbûna ademî jî tê binavkirin. Ew pergal tenê ji aliyê rêveberiyê ve ye ne federal bûne. Bi vê têgihiştinê ez dixwazim girîngiya destûreke nû ya bi beşdariya sivîl tekez bikim.”
Herî dawî Mustafa Şentop axivî. Mustafa Şentop jî diyar kir ku divê ji aliyê aştiya civakî ve gav bên avetin û got: “Dibe ku ev di çarçoveya destûreke nû de were nîqaşkirin. Ji bo ku edalet bi temamî pêk were û ji bo ku di wijdana civakî de rewa bibe ev girîng e.”
Piştî axaftina serokên berê yê meclîsê, Serokê Meclîse Numan Kurtulmuş axivî. Numan Kurtulmuş jî bi lêv kir ku wan civîna xwe ya 7an jî qedandiye û wiha axivî: “Bi hêvî ye ku em ê bi lez civînên xwe bidomînin û encamê bistînin. Em dibînin ku em bi hêvî ne. Ji ber nêzîkatiyên we yên bi hêvî ez spasiyên xwe pêşkêşî we dikim. Ez dibînim ku ev civîn, her ku diçe li ser civakê û beşên cuda belav dibe û didome. Hevalên hêja, mijara vê civînê û rojeva wê qediya.”
Piştî axaftinan civîna komîsyonê ya 7an bi dawî bû.
Hate hînbûn ku hefteya pêşiya me wê komîsyonê necive, dê hefteya piştî wê dîsa bicive.
