Endamê Desteya Hevserokatiya PYDê Salih Muslim di Kongreya Hevpeymaniya Sosyal Demokrat a Welatên Erebî de diyar kir ku li Rojavayê Kurdisanê sîstemeke bê hempa heye û got: “Ji bo vê çendê me sûd ji felsefeya birêz Ocalan wergirtiye. Tevî hemû êrişên ku Tirkiye li ser jêrxana herêmên me pêkanî, lê cardin me li ber xwe daye.”
Endamê Desteya Hevserokatiya PYDê Salih Muslim di Kongreya Hevpeymaniya Sosyal Demokrat a Welatên Erebî de li ser çend mijarekê axivî. Salih Muslim anî ziman ku tevî evqas êriş û ambargoyên ku ji aliyê Tirkiye ve li ser herêmên wan pêkhatin jî li ber xwe dane û got: “Niha jî li Rojavayê Kurdistanê ezmûnek me ya bê hempa heye. Em dixwazin di avakirina siberoja welatê me de şirîkê hevbeş bin.”
Salîh Muslim di dewama axaftina xwe de diyar kir ku li Rojhilatê Suriyeyê modeleke demokratîk a jiyana hevbeş ya bê hempa hatiye avakirin û wiha lê zêde kir: “Me kariye parastinê li vê projeya xwe bikin û ji bo vê çendê jî me sûd ji felsefeya birêz Ocalan wergirtiye. Ezmûna me li Rojhilata Navîn ezmûneke taybete. Bi taybetî li cihek wek Sûriye ku gelek kes ne li bendê bûn. Ew nenavendîbûna ku em dixwazin dikare ji bo Sûriye û herêmê bibe projeyeke aştiyê.”
Li Silêmaniyê duh Kongreya Hevpeymaniya Sosyal Demokrat a Welatên Erebî dest pê kir. Ji bo tevlibûna kongreyê şandeya PYDê ji Rojava û şandeyek jî ji DEM Partiyê ji Bakurê Kurdistanê hatine Silêmaniyê.
