Amed – Li herêmê piştî kanên madenê hatin vekirin, Çemê Sarûmê ziwa dibe. Ji ber çem zuwa dibe bi hezaran masî dimirin. Şeniyên herêmê diyar dikin ku şîrketa madenê ya Dîmîn ava çem dikşînê kanên sondajê û çem ziwa dike.
Xwezaya Kurdistanê bi salan e bi destê şîrketên taybet û bi şewata daristanan tê talankirin. Şîrketên bazirganiyê bi salan e bi kanên madenê xwezayê talan dikin. Li aliyekî zozan û geliyên Kurdistanê li welatiyan tê qedexekirin, li aliyê din herêm ji talankirina şîrketên bazirganiyê re serbest e. Daristan, rûbar, çem, zozan û bi tevahî xweza bi destê van şîrketan li pêş çavan tê tunekirin.
Yek ji wan herêmên ku ji kanên madenê re hatiye vekirin û talankirin Çemê Sarûmê ye. Çemê Sarûmê di navbera Pasûr û Licê de bi salan e diherike. Di Kurdistanê de yek jî xwezaya dewlemend û zindî herêma Çemê Sarûmê ye. Ev herêm ji aliyê ajal, dar, daristan, fêkî û nebatên din ve pir dewlemend e. Masiyên cur bi cur, çûkên xweşik li herêmê dijîn. Gundî tevahî xwarin, fêkî û teamên xwe ji xwezayê kom dikin. Lê piştî sondaj û avakirina kanên madenê xwezayaya herêmê talan dibe. Ajal êdî nikarin li herêmê bijîn. Şêniyên herêmê nikarin di nava bexçeyên xwe de karên çandiniyê bikin.
Piştî sondajê av ziwa bû
Li herêmê dema dest bi legêrina madanê û sondojan kirin, ava çem ziwa bû. Şîrketa Dîmîn a madenê hemû ava çem dikişîne û çem ziwa dibe. Ji ber çem ziwa dibe, hemû dar, daristan û bexçeyên şêniyên herêmê hişk dibin. Ji ber ava Çemê Sarûmê ziwa dibe, bi hezaran masî bêav man û mirin. Şêniyên herêmê diyar dikin ku av ji aliyê şîrketên madenê ve tê xerckirin û gelek rojan ava wan tuneye. Şênî destnîşan dikin ku piştî kanên madenê hatin vekirin, êdî ava çem ziwa dibe û nikarin wekî berê çandiniyê bikin.
