Weqfa Mafên Mirovan a Tirkiyeyê (TÎHV) nêrîn û pêşniyarên xwe yên der barê çareseriya pirsgirêka kurd de pêşkêşî Serokê Serokê Komîsyona meclisê Numan Kûrtûlmûş kir. TÎHV, nêrîn û pêşniyazên xwe di bin şeş sernavan de pêşkêşî komîsyonê kir û destnîşan kir ku komîsyon ji bo pêvajoyeke çareseriya aştiyane derfeteke girîng pêşkêşî Tirkiyeyê dike. Di pêşniyaran de hat destnîşankirin ku divê komîsyon li gorî rêgezên mafên mirovan tevbigere û TÎHV ji bo pêşveçûna pêvajoyê bi her awayî amade ye ji bo piştgiriyê.
Hin pêşniyarên TÎHVê ev in:
“*Komîsyon divê di destpêka xebata xwe de beyaneke niyetê bide ku nirx û rêgezên mafên mirovan ên gerdûnî wekî normên bingehîn ên ku nayên bazarkirin qebûl bike û soz bide ku ev nirx û rêgez dê di dema xebata komîsyonê de wekî bingehek li derî nîqaşan esas bên girtin.
*Ev beyana niyetê dê di heman demê de bibe alîkar ku pirsgirêkên ku hewceyê guhertinên qanûnî nînin zelal bibin. Ger divêtiyên peymanên navneteweyî yên ku Tirkiye alîgirê wan e û biryarên Dadgeha Mafên Mirovan a Ewropayê (DMME) bên pêkanîn, dê gelek pirsgirêk ji holê rabin û komîsyon dê karibe bi hêsanî bigihîje armanc û hedefên xwe yên diyarkirî.
*Divê Komîsyon ji meclisê re pêşniyaz bike ku meclis ne tenê organa qanûndanînê ye, di heman demê de xwediyê desthilata çavdêriya rêveberiyê ye jî û ji bo rê li ber tiştên kêgî û nediyar bê, divê bang li rêveberiyê bike û di vî warî de tewsiyeyan li meclisê bike.
*Wekî ku di banga pisporên NYyê de ya bi dîroka 11ê Nîsana 2025an, ku rasterast bi vê pêvajoyê ve girêdayî ye, hatiye destnîşankirin, divê komîsyon bi nêzîkatiyên bibandor û berbiçav sûdê ji pisporên navneteweyî yên têkildarî mijarê bigire, di warê bêççekkirin û jinûve entegrasyonê.
*Divê komîsyon bernameyên berfireh, tevî rêziknameyên qanûnî pêş bixe ku maf û azadiyên bingehîn ên kurdan, bi taybetî mafên wan ên nasname û çandî, garantî bike.
*Komîsyon divê usûla biryargirtinê di ber çavan re derbas bike û li gor xwezaya nçêvengeke muzakereyê ya ji bo peydakirina aştiya civakî tenê ne di warê amadekirina pêşniyazên qanûnî, divê di her warî de li ser rêbaza konsensusê tevbigere.
