Şirnex– Bi sedan makîneyên kar piştî salên 2015an ve ketine nava Çiyayê Cûdî û talan dikin. Ajansa Welat kete van herêmên qedexekirî û hilweşandina Çiyayê Cûdî xiste qeydê.
Li Şirnexê bi salan e bi destê dewletê, endamên AKPê, cerdevan û hevkarên wan xweza tê talankirin. Li Çiyayê Cûdî bi dehan kanên komirê hatine vekirin û her roj bi sedan makîneyên kar ji çar aliyan ve Çiyayê Cûdî hildiweşînin. Piştî 10 salan cara yekemîn em wekî Ajansa Welat ketin cihê qedexe. Em ketin nava Çiyayê Cûdî û talana pêk tê me qeyd kir.
Qeleqolên leşkerî parêzvaniya kujerên xwezayê dikin
Asta talana Çiyayê Cûdî ku ji 2015an ve pêk tê ji ber herêm bi hinceta ewlehiyê ji çûyina sivîlan re qedexe bû, heya niha nedihat zanîn. Dema mirov ji aliyê Şirnex ve berê xwe dide herêmên kanên komirê yên di nava Çiyayê Cûdî de destpêkê gundê Bîran mirov pêşwazî dike û piştre qeleqolên leşkerî. Li gel bi dehan qanên komirê weke parêzvanên kujerên xwezayê bi dehan qeleqol jî di nava Çiyayê Cûdî de hatine avakirin. Piştî gundê Bîran, gundê Bilkasma û Cifane derdikevin pêşberî mirov û kanên komirê jî ji vir destpê dikin.
Bi sedan makîne Çiyayê Cûdî xera dikin
Ji gundê Cifane heya ku devera me karî em biçin, bi qasî 35 kîlometreyan dirêj e. Di despêkê de kanên komirê yên gundê Gilindor xuya kirin. Bi dehan kanên komirê li vir hatine vekirin û aliyek ê Çiyayê Cûdî li vir hatiye hilweşandin. Ev hilweşandin dema em gehiştin Gundkêremo pêtir kete ber çavên me û herî dawî jî, ji dûr ve be jî kanên komirê yên gundê Spîndarokê xuya dikirin. Ji ber ku herêm gelekî berfireh e û herêm qedexe ye, mirov nikare yek û yek talanê qeyd bike. Ango her dera talan tê kirin mirov nikare biçe navê. Lê dema mirov van herêman hemû têxe nava wêneyekî; Bi sedan makîneyên kolanê, bi sedan kamyonên, ax, kevir, komir barkirî û hilweşîna çiyayekî derdikeve dolê.
Bolunmez ê AKPî û hevkarên wî yên gundî xwezayê talan dikin
Kanên komirê yên di 10 salên dawî de hatine vekirin piraniya wan li nav tixûbên gundên Gundremo, Gilindor, Nêvava û Spîndarokê hatine vekirin. Li gor agahiyên hatine bidestxistin, destûra vekirina qanên komirê di destê endamê AKPê Suleyman Bolunmez de ye. Her wiha ji ber ku li Şirnexê li dijî Bolunmez bertek heye karê derxistina komirê bi xwe nake û ev kar daye hin gundiyên gundê, Gilindor, Gundkêremo û Spîndarokê.
Bi dînamîtan kanên komirê vedikin
Di dîmenên me kişandin de makîneyên ku biran li nav çiyayî de vedikin hene û piştî vekirina bîrên bi makîneyên kar, dînamîtan berdidin van bîran û di bin erdê de dînamîtan diteqînin. Ji ber vê yekê ava di geliyê van gundan de dihat çik bûye û kaniyên bi sedan salane av jê dihat zuwa bûne. Li devera Geliyê Hirçê kevir û axa ji kanên komirê derdikeve berdidin nava robarê gelî. Ji ber vê yekê pêşiya avê hatiye girtin û bi sedan darên fêkî hiştine bê av.
Ji talanê re serbest e, lê ji gundiyan re qedexe ye
Herêma van gundan heya îro jî qedexe ye. Şêniyên van gundên salên 1990î hatine valekirin dema bixwazin herin nava gundên xwe yên talankirî bi destûra leşkeran û keyayên gundên vale dikarin biçin. Lê ev destûr jî hertim nayê dayîn. Mînak ji bo gundê Spîndarokê îsal tenê dema çinîna simaqê rojekê destûr hatiye dayîn. Her wiha destûra gundên weke Gilindor, Gundkêremo û Akêtê jî dema çinîna gozan tê dayîn û ev destûr jî ger dewlet bixwaze dide.
