Parlamentera Sêrtê Sabahat Erdogan Saritaş li ser nûçeya me ya derbarê îhaleya birîna daran a li navçeya Berwariyê pêşniyazpirsekê da Serokatiya Meclîsê.
Weke ajans me derxistibû holê ku ji aliyê Midûriyeta Çandinî û Daristanan a Sêrtê ve ji bo birîna daristanan îhale pêk hatiye û piştî vê yekê sercerdevanên gundê Hosyanê ya ser bi navçeya Berwariyê ya Sêrtê ve Medenî Bîlen û Mehmet Bîlen dest bi birîna daristanan kirin e.
Li ser weşandina nûçeya Ajansa Welat, Parlamentera DEM Partiyê ya Sêrtê Sabahat Erdogan Saritaş pêşniyazpirsekê da Serokatiya Meclîsê. Sabahat Erdogan Saritaş xwest ku Wezîrê Hawirdor, Bajarvanî û Guhertina Avhewayê Mûrat Kûrûm bersiv bide pêşniyazpirsa wê.
Pirsên ku Erdogan Saritaş arasteyî wezîr Mûrat Kûrûm kirin e, ev in:
* Îhaleyên di salên dawî de hatine kirin ji aliyê kîjan saziyan ve pêk hatine, şertnameyên van îhaleyan ji raya giştî re vekirîne, ger ji raya giştî were veşartin sedemê ve yekê çi ye?
* Li deverên dar tên birîn destûr ji gelê herêmê hatiye stendin, ger nehatibe stendin birîna daristanan di çarçoveya kîjan hiqûqê de tê kirin?
* Daristanên ku hatine birîn li ku tên komkirin, li ku tên firotin û çiqas pere ji van daristanan hatiye wergirtin, gelo ev agahî di destê saziyên dewletê de hene?
* Di 5 salên dawî de li Sêrt û Şirnexê çiqas dar hatine birîn û nirxê van daran ê aborî çiqas e?
* Piştî birîna daristanan derbarê kesên ev yek pêk anîn de lêpirsînek îdarî an jî hiqûqê hatiye destpêkirin?
