Pentagonê ragihand ku di nava hikumeta demkî ya Şamê de endamên rêxistinên terorîst ên wekî “Huras El Dîn” hene.
Endamên Kongreya Dewletên Yekbûyî yên Amerîkayê (DYA) raporek amade kir. Di raporê de wiha hate gotin: “Artêşa nû ya Sûriyeyê ya girêdayî hikumeta demkî bê avahiyek rêxistinî ya hevgirtî ye. Artêş xwe dispêre hevbendiyeke nazik û parçebûyî ku ji berpirsên Heyet Tehrîr El Şam (Cebhet El Nusra) û çend “milîsên sunnî yên tundrew” pêk tê.
Di raporê de hate destnîşankirin ku hin komên wekî rêxistina Huras El Dîn a ku ji aliyê Washingtonê ve wek rêxistineke xeternak tê dîtin û piştî rûxandina rejîma Esed fesixkirina xwe ragihandibû, hegemoniya xwe li Şamê vegerandiye û bandora xwe li ser avakirina siyasetên hikumeta demkî jî didomînin.
Di raporê de ku ji 70 rûpelan pêk tê, hatiye diyarkirin ku Pentagonê li ser firehbûna desthilata hikumeta veguhêz an jî zêdebûna jêderên wan hişyarî dabû. Her wiha tê gotin, rewşa bi vî rengî dê bandoriya QSD’ê li Bakur û Rojhilatê Sûriyeyê bihêztir bike û ji her demê bêtir xweseriya bide QSD’ê.
Li gorî heman raporê, guhertina helwesta DYAyê ya entegrasyona HSDê ya nava hêzên Şamê ji bo sivikkirina barê parastina wê ji gefên Tirkiyeyê ye. Hatiye aşkerakirin ku parastina HSDê ji bo xizmetkirina berjewendiyên ewlehiya neteweyî ya DYAyê ye.
Di raporê de hatiye diyarkirin ku Îsraîlê dixwaze herêma ewle ya li ser sînorê xwe yê bi Sûriyeyê re fireh bike, dibe ku dixwaze hin beşên başûrê Sûriyeyê kontrol, dibe nêzî Şamê jî be bigire nav xwe.
Fikarên kongreyê
Di dewama raporê de behsa cezayên li ser Şamê jî hatiye kirin ku endamên Kongreya DYA’yê ji kêmkirina cezayan li ser Şamê bi fikar in, lewre zehmet e ku rêveberiya DYA’yê hin cezayan rake yan jî destûrê bide pêkanîna peymanên aborî ku hikumeta veguhêz bi hin dewletan re îmze kiribû.
Li gorî raporê ku ji aliyê Al Monitor ve hatiye weşandin, hin alîgirên “Huras El Dîn” hewl didin di nava hikumeta nû ya Şamê de cihê xwe çêkin.
Di berdewama raporê de hatiye diyarkirin ku li gorî rayedarên Ajansa Îstîxbarata Parastinê ya DYA’yê, komên girêdayî El Qaîdeyê bi rêjeyeke xweseriyê di bin sîwana Heyet Tehrîr El Şam de dixebitin. Ev yek jî yek jî dihêle ku çeteyên berê yên “Huras El Dîn” tevger û bandora xwe li ser siyasetên polîtîkayên hikumeta veguhêz a Sûriyeyê çêbikin.
Di raporê de hatiye diyarkirin ku Hêzên Operasyonên Taybet ên DYA’yê ji 2016’an ve (dema avabûna Huras El Dîn) bi dehan çeteyên Huras El Dîn li bakurê rojavayê Sûriyeyê bi dronan kuştine. Her wiha hatiye gotin, DYA têkidarî derdora nêzî Ehmed El Şeri hîna bi fikar e.
Di Gulana borî de hikumeta veguhêz a Sûriyeyê çete Ehmed Îhsan Feyad El Hayîs wek fermandarê Firqeya 86’an tayîn kir.
DYA’yê di sala 2021’an de ceza li ser çete El Hayîs birî ku sûcên şer kirine. Wezareta Karên Derve ya DYA’yê tayînkirina wî wek “şaştiyeke mezin” bi nav kiribû.
