AMED – Hunermend Sîpan Xelat bal kişand ser pêvajoya ku hatiye destpêkirin û got: “Ev pêvajo gelek bi qîmet e. Pêvajoya nû ji bo hemû gelên Rojhilata Navîn girîng e. Pêşîlêgirtina şer bi pêşxistina aştiyê pêkan e.”
Rêberê Gelê Kurd Abdullah Ocalan piştî 49 mehan di 23ê cotmeha 2024an de bi biraziyê xwe Omer Ocalan re hevdîtin kir. Ji wê demê heta niha hin hevdîtinên malbatê û şandeyê pêk hatin. Rêberê Gelê Kurd Abdullah Ocalan di hevdîtina ewil de got: “Tecrîd berdewam dike. Eger şert û mercên hiqûqî û siyasî bêne avakirin ez dikarim pêvajoya ji zemîna şer, derbasî zemîna siyasî bikim. Rêberê Gelê Kurd Abdullah Ocalan ji bo çareseriyê di 27ê Sibata 2025an de banga Aştî û Civaka Demokratîk kir. Herî dawî di 9ê Tîrmehê de bangake bi video parve kir. Piştî vê bangê komek endamên PKKê bi merasimeke bi heybet çekên xwe şewitandin û peyama aştiyê dan hemû cîhanê.
Hunermendê Kurd Sîpan Xelat ku bi salan e xizmeta hunera Kurdî dike, derbarê pêvajoya ‘Aştî û Civaka Demokratîk’ de ji Ajansa Welat (AW) re axivî. Sîpan Xelat anî ziman bi pêşengiya Rêberê Gelê Kurd Abdullah Ocalan pêvajoyek aştiyê hat despêkirin û got: “Em bi hurmet nêzîkê vê pêvajoyê dibin. Rêberê Gelê Kurd Abdullah Ocalan di salên 1990î de jî pêvajoyek wisa dabû destpêkirin. Divê her kes li ser xaka xwe azad bijî. Ev mafê rewa ye. Hezar sal in em li ser xaka xwe di bin zextan de dijîn. Bi pêşengiya Rêberê Gelê Kurd birêz Abdullah Ocalan pêvajoyek aştiyê hat despêkirin. Em jî bi hurmet nêzîkî vê pêvajoyê dibin. Rêbertî di salên 90î de jî pêvajoyeke bi qîmet dabû destpêkirin. Dîsa jî heman tiştî dibêje. Em di merheleyeke nû de ne. Gotinên Rêbertî niha bêhtir têne fêmkirin. Piştî gotinên wî yên salên 90î dewletê dîsa kuştin, talankirin û kiryarên xerab kirin.”
‘Şer bi xwînrijandinê û bi pevçûnê nabe’
Sîpan Xelat bal kişand ser pêvajoya nû û got: “Nirxandinên wî ji bo pêşxistin û çareseriyê gelek giring in. Serokatî hertim tîne ziman, êdî bi xwînrijandinê û şer çareserî nabe. Gelên Rojhilata Navîn dikarin bi fikir û felsefeya wî bi hev re bijîn. Pêvajoya nû ji bo gelê Kurd û Gelên Rojhilata Navîn pir girîng e. Piştî şerê demdirêj bi felsefeya Rêbertî re pêvajoyeke nû tê destpêkirin. Ev tişteke pîroz e. Hêvî dikim hemû civak xwedî li pêvajoyê derbikevin.”
‘Çek şewitandin ji bo me bi wate ye’
Sîpan Xelat anî ziman ku Kurd bixwe mirovên pir dil nizm û aştîxwazin û got: “Em ne miletekî şerxwazin. Tu keç û xortên Kurd ne aşiqê çekê ne. Ji ber ku pêwîstî bi çek hatiye dîtin. Çek şewitandin bixwe ji bo me rumet bû. Hêviya hemû dayîkan dîtina zarokên wan e. Şerekî pir qirêj tê meşandin. Pêşîlêgirtina şer bi gav avêtina pêvajoyê tê sekinandin. Kesên ku naxwazin şer bi dawî bibe jî hene. Bi tenê şer ji bo berjewendiyên xwe bikar tînin.”
‘Hêzên serdest edaletê dixin xizmeta xwe’
Di berdewama axaftina xwe de Sîpan Xelat bi lêv kir ku li Tirkiyeyê pirsgirêka edaletê gelek e û got: “Hemû qanûnên xwe binpê dikin. Li Tirkiyeyê kî hêzê bixe destê xwe, edaletê li gora xwe diyar dike. Dema ku mesele dibe Kurd qanûn bê wate dibin. Ev jî rastiyeke Rojhilata Navîn e. Tirkiye jî serkêşiya hemûyan dike. Mînakên wisa gelek in. Gelek kesan şerê azadiyê kirine. Hin kesan jî şerê serdestiyê kirine. Kesên ku di zîndanan de ne, ji bo me gelek girîng in. Qanûn xwe bixwe binpêdikin. Pêvajo hinek bi zehmetî dimeşe. Me hev baş naskiriye. Divê em vîna xwe xurt tir bigirin. Divê em yekîtiya xwe xurt bikin. Lê di encamê wê çareserî jî bê. Kesên zîndanî ji bo me xeta sor in. Gelek mirov bê sûc cezayên mezin xwarin e.”
‘Bila êdî zarokên me neyên kuştin’
Sîpan Xelat di dawiya axaftina xwe de li ser girîngiya komîsyonê jî rawestiya û got “Kesên muhatab mirov jî esas digirin. Komisyona ku hatiye avakirin gelek girîng e. Em hevî dikin ku ew jî êdî bi edalet tevbigerin. Hin nêzîkatî di pêvajoyên wiha de mirov diêşînin. Divê mirov vîna xwe xurt bihêle. Divê gel jî li vê pêvajoyê xwedî derbikeve. Destê ku dirêj dibe divê em jî wisa tevbigerin. Gelek dayikên me kezebên wan şewitîne. Diyarî azadî û rizgariya vî welatî kirine. Bila êdî zarokên me neyên kuştin. Divê êdî hinek tişt bi zanebûn bêne kirin. Ew jî bi tevlibûn û bi qeweta vî gelî bikin. Ev şoreşa ku nav li ser e şoreş a gel e.”
