Endamên DEM Partiyê yên ‘Komîsyona Demokrasî, Xwişk-Biratî û Piştevaniya Mîllî’ anîn ziman ku komîsyon dê hefteya bê li kesên ku di şer de xizmên wan jiyana xwe ji dest dan, mexdûr bûn û bandoreke neyînî li wan bûye guhdar bike.
Endamên komîsyonê yên ji DEM Partiyê Gulistan Kiliç Koçyîgît, Meral Daniş Beştaş, Hakki Sarûhan Olûç, Celal Firat û Cengîz Çîçek têkildarî civînên komîsyonê yên hefteya pêş agahî dan. Endamên komîsyonê yên DEM Partiyê bi bîr xistin ku ‘Komîsyona Demokrasî, Xwişk-Biratî û Piştevaniya Mîllî’ ya li meclîsê ava bû civîna xwe ya sêyemîn doh pêk anî û di vê civînê de li ser rêveçûna komîsyonê, armanc û karê wê nêrîn bi berfirehî nirxandin kirin.
Endamên komîsyonê destnîşankirin ku komîsyon ji bo çareseriya aştiyane û demokratîk a meseleya Kurd, ji bo bicihanîna rola dîrokî ya meclîsê vî karî baş binirxîne dê bixebite.
Endamên komîsyonê di daxuyaniyê de wiha gotin: “Ji nîqaş û nirxandinên hatine kirin, em dikarin bibêjin ku komîsyon bi nêrîneke ku hesasiyetên hemû beşên civakî li ber çavan digire, karên xwe dewam dike. Partiyên ku endam dane komîsyonê, bi berpirsyariyeke dîrokî ya ji bo afirandina dilxwaziya civakê rû bi rû ne. Aştiya civakî bi wê yekê ve girêdayî ye ku gavên bêne avêtin her kesî hembêz bike û bersivê bide pêwîstiyên pêvajoyê.”
Li ser rojeva komîsyonê ya hefteya bê jî di daxuyaniyê de wiha lê zêde kirin: “Hefteya bê rojên Sêşem û Çarşemê, bi hevpariya partiyên ku endam dane komîsyonê wê di çarçoveya hawizê kesayet û saziyan ên hatine avakirin, guhdarîkirin hebe. Her kesên ku di şer de xizmên wan jiyana xwe ji dest dan, mexdûr bûn û bandoreke neyînî li wan bû, wê li komîsyonê bêne guhdarîkirin. Her wiha wergirtina nêrîn û pêşniyarên derdorên hiqûqî û akademîk ên li ser zemîna siyasî û hiqûqî ya ji bo çareseriyê pispor in, wê karên komîsyonê hêsan bike. Piştî guhdarîkirinê komîsyon wê di çarçoveya karên ji bo pêvajoyê bêne kirin û entegrasyona demokratîk de li ser sererastkirinên qanûnî kar bike. Gelekî girîng e ku pêşniyarên li ser sererastkirinên qanûnî yên ji bo demokratîkbûnê û pêvajoyê bêne nirxandin û bi nîqaşeke berfireh bêne biencamkirin. Hêza aştiya civakî û siyaseta demokratîk tenê bi vî rengî dikare pêk were.”
