DEM Partiyê ya Karşiyaka ya Îzmîrê bertek nîşanî girtina Komeleya Avesta da û got “Şaredarî ji bo kongreyê salon neda me û Walîtiya Îzmîrê Komeleya Avesta girt. Girtina komeleyê ne tenê girtina saziyê ye, lê êrîşek li ser ziman, nasname û çandê ye.”
Partiya Wekhevî û Demokrasiyê ya Gelan (DEM Partî) a Karşiyaka ya Îzmîrê ji bo şermezarkirina girtina Komeleya Lêkolînên Çand û Ziman ya Avesta bi beşdariya gelek kesan li avahiya xwe daxuyanî da çapemeniyê. Hevserokên DEM Partiyê yên Karşiyakayê Mehmet Yaşar Şeren û Nerîman Bîrlîkler daxuyanî xwendin.
Daxuyanî wiha ye:
“Birêz Abdullah Ocalan di 27ê Sibata 2025an de bangek kir. Bi vê bangê re hêviyek mezin li ser biryara aştiyê û çareserkirina pirsgirêka kurd di civakê de hat afirandin. Pirsgirêka kurd, di encama têkoşîna 41 salan de, giran bûye û tesîrên wî li ser gelan, bi taybetî jî gelê kurd girîng bûn. Aştiya rast û domdar nikare tenê bi xebatên yek-alî an fêmên kevnar were pêk anîn; divê bi lêkolîn û fêmek giştî, wekî nimûneyên cîhanê, were afirandin û piştgirî were kirin.
Bi şiyara “Di rewşa aştiyê de windaker nînin”, hêvî tê kirin ku rêveberên navendî û herêmî çalakiyên girîng li ser aştiyê pêk bînin. Lê hin walî û serokên bajarê bi helwestên kevnar û ne cîdî, pêvajoya aştiyê asteng dikin.
Şaredarî salon neda, walîtî komele girt
Li Karşiyakayê, daxwazên rêveberiya navçeyê ji bo kongreya xwe pêk bîne daxwaza bikaranîna salonên şaredariyê kir, şaredarî bêyî sedemê nîaşn bide daxwaza me red kir. Ji bo pêkhatina kongreyê me, salonên navenda çandê yên Şaredariya Karşiyakayê hewce bûn, lê hîn jî nedane me. Li Konaxê jî, Komeleya Lêkolînên Çand û Ziman ya Avesta bi hinceta ku ‘dersdana bêdestûr’ li ser fermana Walîtîya Îzmîrê hat girtin. Ev astengkirin rastî li ser aştiya civakî û mafên zimanî ye û pêvajoya aştiyê dijwar dike.
Ev komele ji 2018an ve li ser çand û ziman xebat dike, lê bê teftîş an nirxandinê deriyê wî hat girtin. Ev reya şaredariyê mînake têkoşîna sistematîk li dijî ziman û mafên çandî yên kurdan e.
Kurdî zimanê dayikê ya nêzîkî 25 milyon kesan e, lê qedexeyên zimanî tenê nifaq û pêvçûn pêk anîn. Girtina Komeleya Avesta ne tenê girtina saziyê ye, lê êrîşek li ser ziman, nasname û çandê ye.
‘Dayîna dersên kurdî wê bidomin’
Em bang dikin walîtiya İzmirê ku vê biryara neheq betal bike, şaredariyan jî ku helwestên marjînal berdin dev. Em bi Komeleya Lêkolînên Çand û Ziman ya Avesta hevgirtinê bidomînin û li Karşiyakayê dersên Kurdî yê kurmancî dest pê bikin da ku ziman li herêmê berfireh bibe. Em ji hemû kurd û yên ku dixwazin kurdî fêr bibin re radigihînin.
Dîrok, demjimêr û agahdariyên têkiliyê yên qursan ji bo serlêdanan dê paşê werin parvekirin.”
