Amed – Dayikên Aştiyê yên Amedê diyar kirin ku ew dixwazin biçin hevdîtinê bi Rêberê Gelê Kurd Abdullah Ocalan re bikin û gotin: “Gelo ew çi pêşniyaran li wan dike. Em dixwazin komîsyon û dewlet bi lez gavan biavêjin.”
Meclisa Dayikên Aştiyê ya Amedê roja 7ê Tebaxê daxuyanî dan û ragihandin ew dixwazin bi Rêberê Gelê Kurd Abdullah Ocalan re hevdîtinê pêk bînin. Dayikan xwest rayedar li ber wan rê vebikin û bibin alîkar da ku biçin Girtîgeha Girava Îmraliyê û bi Abdullah Ocalan re rû bi rû hevdîtinê bikin.
Meclîs û Înîsiyatîfa Dayikên Aştiyê li ser daxwaz û pêşniyara Abdullah Ocalan di sala 1999an de bi daxwaza pêkanîna aştiyê û çareserkirina pirsgirêka Kurd hat damezrandin. 25-26 sal in Dayikên Aştiyê bênavber ji bo pêkanîna aştiyê têdikoşin û diyar dikin heta ew aştiyê bînin vî welatî dê qet ranewestin.
‘Birêz Ocalan hemû peywîra xwe bi cih anî, dora dewletê ye’
Endama Meclîsa Dayikên Aştiyê ya Amedê Makbule Ozbek ku tev li daxuyaniya ji bo çûna Îmraliyê bû da zanîn ku ji ber ku heta niha ji aliyê dewletê ve gavên şênber nehatine avêtin wan ji rêvebirina pêvajoyê fêm nekiriye. Makbule Ozbek anî ziman ku ew dibêjin aştî lê hê wan tu aştiyek berbiçav nedîtiye û wiha got: “Hin mirovên me hene dibêjin aştî lê ji bo aştiyê tu gavek nehatiye avêtin. Hemû pêvajo û gavên hatine avêtin jî ji aliyê birêz Ocalan ve hatine avêtin. Birêz Ocalan hemû peywira xwe bi cih aniye. Lê em jî hinek ji vê pêvajoya hatiye destpêkirin bi gumanin. Tişta ku ketiye ser milê birêz Ocalan kiriye, divê êdî dewlet jî gav biavêje. Em jî dixwazin bi birêz Ocalan re hevdîtinê bikin. Em jî weke Dayîkên Aştiyê, dixwazin di nava vê komîsyinê de ji wan re hin bersivan bişînin. Sedema ku dayîkan jî nakin nava xwe çi ye? Divê ku kesên di komîsyonê de ne di nava miletê de bigerin û bi miletê bidin fêmkirin. Ji dayîkên leşker û polîsan re pêvajoya heyî divê bidin fêmkirin. Pêvajo ya aştiyê ye divê em xwe aştiyê re amade bikin. Em dixwazin bi serok re biaxivi. Her tişt li ser milê dayîkan e. Em dixwazin ji me bixwaze, ka çi ji me tê xwestin? Em zanin yekîtî û hevdîtin ji me tê xwestin û van tiştan bi miletê bidin fêmkirin. Dayîk li pêşiya her tiştî ne, li ku çi bi qewime dayîk bezdidin wir. Em dixwazin ku ew jî ji miletê xwe re bibêjin, dê yekitiy Kurd û Tirkan pêk were. Em aştî û wekheviyek rastî û ronî bi hev re bikin.”
‘Pêdiviya her kesî bi Serok heye’
Makbule Ozbek diyar kir ku kesên ku di nava komîsyonê de cih girtine ew jî di nava miletê xwe de ne û ji êşa miletê xwe fêm dikin û got: “Divê ku ew jî van kiryarên tenê kirin, bînin ziman. Me têra xwe tişt dîtine û em têra xwe hatine girtin û me şehîd dane. Divê ew jî di meclîs û di komîsyonê de bînin ziman. Em dixwazin ku Serokê me bê berdan, di nava gelê xwe de be, da ku her kes pêre dikaribe biaxive. Pêdivîya her kesî pê heye. Ji ber ku pêdiviya her kesî bi axaftinê heye, çi zarok û çi jî mezin ev pêdivî ji bo her kesî heye.”
‘Du sê heb dayik bila biçin hevdîtinê bikin’
Endama Meclîsa Dayika Aştiyê Afîfe Kartal jî bi bîr xist ku heft meh in pêvajoya aştiyê hatiye destpêkirin û nêrînên xwe wiha anî ziman: “Ez jî weke dayîkek aştiyê dixwazim du-sê heb Dayîkên Aştiyê biçin bi birêz Ocalan re hevdîtinê bikin. Heta ku dayîk neçin pê re hevdîtinê nekin dê tiştek jî çareser nebin. Divê tecrîd jî ji serê bê rakirin. Dayîkan canê xwe û zarokên xwe dane û zarokên wan hatine girtin û ketine binê erdê. Divê dayîk pê re pêwendiyê deynin. Me dixwest ku du heb Dayikên Aştiyê jî di nava vê komîsyinê de cih bigirin. Em destê xwe dirêjî aştiyê dikin dirêjî şer nakin. Hemû teyareyên xwe di ser serê me de radike û tu gavek ji pêş ve neavêtiye. Divê êdî ew ji gavan biavêje pêş. Divê AKP-MHP û dewletên dinê jî gav biavêjin. Bila ew dewletên dinê bizanibin em aştiyê dixwazin, şer naxwazin.”
‘Dîmenekî wî bes bû’
Afîfe Kartal destnîşan kir ku daxwaza dayikan a teqez ew e ku bi Rêberê Gelê Kurd Abdullah Ocalan re hevdîtinê bikin û ev yek anîn ziman: “26 sal bûn ku me wî nedîtibû, dema ku me dîmenê wî dît, me got qey hemû dinya li ser serê me hat hevdu. Em ewqas ketin kelecaneke mezin. Yên girtîgehê dibêjin haya me ji tiştekî tuneye, dewlet gava neavêtiye em dibêjin aştî çêdibe. Heta ku van girtiyên 30-33 salên xwe tije kirine neyên berdan, em nikarin qala aştiyê bikin. Dema ku ew bên berdan em ê wê demê bibêjin wa tiştek heye. Em di ruyê dewleta Tirk de jidilbûna aştiyê nabînin. Dema ku destûra me bê dayîn, em biçin bi Serokê xwe re hevdîtinê bikin, em ê wê demê zanibin ku va tiştek heye.”
‘Em ê her aştiyê bixwazin’
Afîfe Kartal da zanîn ku heta ku ew saxbin ew ê aştiyê bixwazin û qîr bikin û di dawiyê de wiha got: “Me kezeba xwe winda kiriye em dibêjin bila tu dayîk kezeba xwe winda neke. Bila êdî tu dayîk li pey kezeba xwe negirî. Banga me li dewletê ye; em dibêjin bila rê veke em biçin cem Serokê xwe.”
