Şirnex- Li Cizîrê qeyûm hemû parqên bajêr radestî saziyên dewletê kirine. Ji ber van kiryarên qeyûm, Şaredariya Cizirê nikare li parkan xizmetê bide gel.
Li navçeya Cizîr ya Şirnexê beriya hilbijartinên 31ê adara 2019an û 31ê adara 2024an qeyûman ji 22 parqên bajêr 18 parq radestî saziyên dewletê kirin. Ji ber ku ev parqên bajêr di deste saziyên weke gerînendeyên, cenderme, polis, perwerde, diyanetê de ne, şaredarî bi awayek fermî nikare xizmetê ji gel re bike.
Parqên şaredariyê dane Fermandariya Cendermeyan a Cizîrê
Hevşaredarê Cizîrê Abdûrrahîm Dûrmûş derbarê rewşê de got ku qeyûm parqên bajêr ên ku çavkaniya pereyan e, hemû dane saziyên dewletê û wiha axivî: “Tevahiya parqên Cizîrê radestî saziyên dewletê kirine û tişta herî zêde em zehmetiyê dikêşin ev mijar e. Beriya ku em werin ser kar qeyûm Nazli Demîr hemû parqên ku pere jê derdikeve dane saziyên weke Gerînendeya Emniyetê ya Cizîrê, Fermandariya Cendermeyan a Cizîrê, Gerînendeya Perwerdehiyê ya Cizîrê, Gerînendeya Karên Olî ya Cizîrê, Gerînendeya Ciwan û Werzişê ya Cizîrê. Wekî din dane gelek saziyên din ên dewletê.”
Ji ber van saziyan em nikarin xizmeta gel bikin
Abdurrahman Dûrmûş destnîşan kir ku ji ber di fermiyetê de parqên bajêr ne di destê wan de ne ew nikarin xizmetê ji gel re bikin û axaftina xwe wiha berdewam kir: “Ji ber ku bi awayek fermî ev parqên Cizîrê di destê van saziyan de ne, weke Şaredariya Cizîrê em nikarin xizmetê bibin van parqan. Ji bo ku gelê me mexdûr nebe dîsa jî tişta ji destê me tê em dikin. Lê dema em xizmeta van parqan dikin, dewlet dibêje ev xizmeta we kiriye bûye zerara şaredariyê.”
Parqên bajêr di destê saziyên dewletê de ne deynê eletrîkê ji şaredariyê re tê
Abdurrahman Dûrmûş herî dawî da zanîn ku her meh bi sedan hezar fatûreyên elektirîka van saziyên parq dide destê wan de ji şaredariyê re tê û axaftina xwe wiha bi dawî kir; “Her wiha ev saziyên parqên Cizîrê radestî wan hatine kirin, xizmeta van parqan nakin, ne paqiji, ne ewlehî, ne avdan û ne jî ronîkirina parqan a şev. Di 17 mehên dawî yên em hatine ser kar de bi mîlyonan deyne elektrîka van parqan ji şaredariyê re hatiye û li gel ku ev parq ne didestê şaredariyê de ne jî fatûreyên elektrîkî ji me re dibirin. Vaye gelek caran em ji van saziyan re dinivîsin ku aboneya elektrîkê bibin ser navê xwe lê bersivê nadin me.”
