Rêberê Gelê Kurd Abdullah Ocalan ji bo gelê Wargeha Penaberan a Şehîd Rûstem Cudî nameyek şand û got: “Em ê meseleyên civakî, siyasî û hiqûqî bi awayekî kolektîf bigirin dest û li ser vî esasî ber bi çareseriyê ve biçin.”
Gelê Wargeha Penaberan a Şehîd Rûstem Cudî ji ber zextên dewleta Tirk ên li Bakurê Kurdistanê 31 sal in li Mexmûrê di şert û mercên herî dijwar de berxwedaneke bêhempa raber dike. Rêberê gelê Kurd Abdullah Ocalan ji bo gelê wargehê nameyek şand.
Nameya Rêberê Gelê Kurd Abdullah Ocalan li Navenda Çand û Hûnerê ya Şehîd Sefkan bi gel re hate parvekirin. Di dema xwendina nameyê de gelê Mexmûrê kêliyên hestiyar jiyan. Coş û kelecana gel di asta herî jor de bû. Gel nameya Rêber Apo bênavber bi dirûşmeya “Bijî Serok Apo!” pêşwazî kir û biryardariya xwe ya têkoşînê careke din raber kir.
Nameya Abdullah Ocalan wiha ye:
“Ji bo gelê Mexmûrê yê hêja;
Ez silavên xwe yên germ ji bo hemû gelê me yê Mexmûrê dijî dişînim. Gelê me yê Mexmûrê di dîroka têkoşîna me de bi roleke pir girîng rabûye û bûye xwediyê cihekî pir bi nirx. Ruxmê hemû zehmetiyan jî, bi pratîka xwe nîşan daye ku berxwedan jiyan e û qehremanên mezin derxistine û barê têkoşînê yê giran bi awayekî serkeftî hilgirtiye ser milên xwe. Îspat kiriye ku şert çi dibin bila bibin, jiyana azad ji ser her tiştî re ye. Û bûye xwediyê sekin û kedeke layiqî gelê Kurd û têkoşîna gelê Kurd.
Ez di wê baweriyê de me, gelê me yê Mexmûrê çawa ku berê bû stûna bingehîn a têkoşîna me, di pêvajoya avakirina Aştî û Civaka Demokratîk de jî wê bibe xwediyê heman rol û misyona girîng. Wekî hêza dînamîk ya vê pêvajoyê, bûyîna xwedî berpirsyarî û pêşengtî kirin, pêwîstiya mîrasa wan ya têkoşînê ye. Xaleka hevdîtînên me jî li ser rewşa gelê me yê Mexmûrê ye. Bêguman bi pêşketina pêvajoyê re vegera wan a ser xaka xwe wê çêbibe. Lê belê pêwîst e were zanîn ku, divê nêzîkatiyên ferdî û malbatî dernekevin pêş. Em ê meseleyên civakî, siyasî û hiqûqî bi awayekî kolektîf bigirin dest û li ser vî esasî ber bi çareseriyê ve biçin.
Di derbarê yên Mexmûr, yên Ewropa û tevahî yên penabertiyê de wiha difikirim: Vegera hemûyan wê kolektîf be û erdnîgariyê em ê hilbijêrin. Gelo ew jî ixwazin vegerin?
Ez bawer im ku nîv bi nîv dê bixwazin vegerin. Divê em vegerê kolektîf bifikirin. Di vê çarçoveyê de silavên min li gelê me yê Mexmûrê bikin.
Li ser vî esasî di serî de jin û ciwan silavên xwe û hezkirinên xwe yên kûr û bêdawî ji tevahî gelê Mexmûrê re dişînim.”
