Mehmet Îsa Aydogan ku poşmanîtî qebûl nekir, berdana wî salekê hat taloqkirin. Dozger gef li Aydogan xwar û got: “Ez te wisa bi rehetî bernadim.”
Mehmet Îsa Aydogan ku li Êlihê di sala 2016an de bi îdiaya “endamtiya rêxistinê” hat girtin, cara sêyemîn berdana wî hat taloqkirin. Piştî ku cezayê xwe yê 10 salan temam kir, dihat payîn ku Aydogan di Sibata 2024an de were berdan. Berê Desteya Îdare û Çavdêriyê ya Girtîgeha Tîpa T a Osmaniyeyê bi îdiaya “poşman nebûye” ji bo şeş mehan berdana wî taloq kiribû. Piştre ew careke din derket pêşberî desteyê û bi heman hincetê berdana wî ji bo salekê hatibû taloqkirin. Li gorî nûçeya Ahmet Kanbal ê nûçegihanê Ajansa Mezopotamyayê; Aydogan vê dawiyê careke din derket pêşberî desteyê û berdana wî ji bo saleke din dîsa hat taloqkirin.
Aydogan di hevdîtina bi telefonê de ya bi malbata xwe re ragihand ku berdana wî ji bo salekê careke din hatiye taloqkirin. Aydogan anî ziman ku ew derketiye pêşberî desteyê û berî ku ew dest bi hevdîtinê bike, dozgerê girtîgehê pirsên wekî “Tu hatî ser hişê xwe? Tu poşman î?” ji wî pirsîne û got ku bersivên wî bûne sedema taloqkirina berdana wî.
Aydogan diyar kir ku dema ku ev pirs ji aliyê lijneyê ve ji wî hatine pirsîn, wî gotiye: “Ez poşman nînim. Ez ji bo armancek ku ez jê bawer dikim li vir im.” Piştre dozger jê re gotiye, “Ez ê te wisa bi rehetî bernedim.”
