Wan – Lijneya Rêveberiyên Cihkî ya DEM Partiyê li şûna Hevşaredarê Rêya Armûşê Cevdet Altindag ku ji ber pirsgirêkên tendûristiyê îstîfa kiribû, Tahîr Şapkaci weke hevşaredarê nû hilbijart.
Hevşaderê Rêya Armûşê Cevdet Altindag, ji ber pirsgirêkên tendûristiyê çend meh beriya niha ji hevşaredariyê îstîfa kiribû. Lijneya Rêveberiyên Cihkî ya Partiya Wekhevî û Demokrasiyê ya Gelan (DEM Partî), endamê meclîsa şaredariya Rêya Armûşê û cîgirê hevşaredaran Tahîr Şapkaci weke hevşaredarê nû hilbijart.
Rêveberiya şaredariyê derbarê mijarê de daxuyaniyek belav kir û hevşaredarê nû ragihand. Di daxuyaniyê de wiha hat gotin: “Piştî hilbijartinên herêmî yên 31ê Adarê, DEM Partiyê ku bi piştgiriyeke mezin şaredarî bi dest xistî, tevî texrîbatên mezin ên qeyûm jî, zêdetirî salekê bi baldarî xebitî da ku ji bo gelê Rêya Armûşê xizmetên baş û qenç bike. Pêvajoya destnîşankirina hevserokê nû ji hêla Lijneya Rêveberiyên Cihkî ve bi hevkariya komîteyên peywendîdar ên partiyê ve hate meşandin.
Tahîr Şapkaci ku weke hevserok hate hilbijartin, endamê meclîsya şaredariyê ye ku bi dengên xelkê Îpekyoluyê hatiye hilbijartin û di heman demê de weke cîgirê şaredar jî dixebite. Weke rêveberiya Şaredariya Rêya Armûşê, em ji bar û berpirsiyariya ku em hildigirin haydar in. Em dê bi hevserokên xwe Canan Uzunay û Tahir Şapkaci re sozên ku me dane gelê xwe bi baldariyeke mezin bi cih bînin.”
