Sê sal in cezayê Resul Baltaci qediya ye. Lê ev 33 sal in nayê berdan. Kurê Resûl, Azad Baltaci xwest ku Desteya Îdarî û Çavdêriyê ya girtîgehê demildest dawî li bêhiqûqiyê bîne.
Nivîskar Resul Baltaci yê ku li Êlihê di 15ê Cotmeha 1992yan de hatibû binçavkirin û ji aliyê Dadgeha Ewlekariya Deweletê bi idiaya “xerakirina yekitî û yekpareyiyaya dewletê” cezayê muebedê lê hatibû birîn. Baltaci yê ku niha li Girtîgeha Çîlîmlî ya Duzceyê tê ragirtin, tevî ku cezayê xwe yê 30 salî qedandiye jî 33 sal in nayê berdan. Desteya Îdarî û Çavdêriyê ya girtîgehê înfaza wî taloq kir û berdana Baltaci asteng dike. Di sala 2022yan de mafê tehliyeya bişert bi dest xistibû, lê belê ji ber cezayê hucreyê yê berê ev mafê wî ji hate astengkirin. Baltaci ji ber kartên Newrozê, pirtûk, pênûs, meqes ên ku bi destûra îdareyê girtîbû qawişê û gerandina govendê bi hevalên xwe re cezayê hucreyê girtibû.
Malbata Baltaci ev 33 sal in li ser rêya girtîgehê diçe û tê. Dayika Baltaci Nihbet, bavê wî Huseyin derketina lawê xwe nedîtin û wefat kirin. Kurê Baltaci, Azad Baltaci ê ku piştî girtina bavê xwe bi 3 mehan ji dayik bûbû niha tevî zarokên xwe diçe serdana bavê xwe. Baltaci yê ku 11 sal in li Girtîgeha Duzceyê tê ragirtin, daxwaza wî ya sewqa Êlihê nayê qebûlkirin.
Azad Baltaci yê ku tenê bavê xwe li nav çar dîwaran dîtiye û 33 sal in li ber deriyê girtîgehê ye, ji Ajansa Mezopotamyayê re axivî û daxwaza dawîbûna bêhiqûqiyê kir.
‘Li Girtîgeha Duzcueyê hiqûq nîn e’
Azad Baltaci diyar kir ku Girtîgeha Duzceyê navenda bêhiqûqiyê ye û wiha got: “Tehliyeya bavê min nêz bû lêbelê ji bo astengiya tehliyeyê ketin nava hewldanan. Ji ber hinceta ‘nebaşhaliyê’ wî tehliye nekirin. Piştre înfaza wî şewitandin. Cezayên hicreyê yên bihqûqî kirin hinceta şewata înfaza wî. Tehliyeya wî ji i hinceta Xala 7’emîn a Qanûna Têkoşîna Li Dijî Terorê (TMK) hate astengkirin. Wexta bavê min hate girtin TMK tunebû lê niha jî ji bo tehliyeya bavê min asteng bikin, dikin hincet. Bavê min ji ber vê bihiqûqiyê gelek caran daxwaza şandeyekî kir, em niha careke din bi rêya we bang dikin bila şandeyek biçe serdana Girtîgeha Duzceyê. Lewre li wir ne hiqûq heye ne jî pêvajoya aştiyê.”
Baltaci destnîşan kir ku bavê wî ji bo sewqa Êlihê, 11 sal in têdikoşe û dora 40 heb daxwazname şandiye û got: “Lê belê sewqa wî nayê kirin. Ev 11 sal in em diçin Duzceyê. Rêya wê 23 saet in û diya min ji ber ku nexweş e gelek caran nikare biçe serdanê.”
