Jody Williams a ku di sala 1997’an de Xelata Aştiyê ya Nobelê wergirt û Dr. Şirîn Ebadî ya ku sala 2003’yan heman xelat wergirt, di nameya xwe ya ji rêxistinên navneteweyî re şandin de azadiya Abdullah Ocalan û tevlibûna wî ya li pêvajoya aştiyê, xwestin.
Jody Williams û Şirîn Ebadî weke nûneriya 88 Xelatgirên Nobelê, nameyek nivîsandin. Li gorî nûçeya Ajansa Nûçeyan a Firatê (ANF) di vê nameyê de ji Komîteya Wezîran a Konseya Ewropayê, Dadgeha Mafên Mirovan a Ewropayê (DMME), CPT û Komîteya Mafên Mirovan a Neteweyên Yekbûyî (NY) hate xwestin ku Rêberê Gelê Kurd Abdullah Ocalan azad bibe û tevlîbûneke tam û bêastengî ji pêvajoya aştiyê re çêbibe.
‘Birêz Ocalan ji bo gelên herêmê ronahiyeke hêviyê ye’
Di nameyê de hate diyarkirin ku ew piştgiriyê didin banga aştiyê ya “Rêberê Kurd Abdullah Ocalan” û hate destnîşankirin ku ew ji ber şert û mercên girtîbûna ya Abdullah Ocalan a 26 salan bi fikar in. Di nameyê de wiha hate gotin: “Li seranserî cîhanê di demeke ku şer zêde dibin de, li Tirkiyeyê banga aştî û demokrasiyê ya Birêz Ocalan ji bo gelên herêmê ronahiyeke hêviyê ye. Weke saziyên navneteweyî û Ewropayê, girtîbûna bi dehan salan a Birêz Ocalan ji bo we meseleyek nû nîne. Weke Xelatgirên Nobelê me berê jî derbarê rewşa Birêz Ocalan û girtiyên din ên siyasî yên li Tirkiyeyê, name ji we re şandibûn.”
‘Divê Birêz Ocalan azad bibe û bi awayekî tam tev li pêvajoyê bibe’
Di nameyê de îşaret bi banga Rêberê Gelê Kurd Abdullah Ocalan a 27ê Sibatê û kongreya PKKê ya xwefesixkirinê hate kirin û wiha hate gotin: “Di vê bangê de hate destnîşankirin ku xurtkirina xwişk-biratiya gelên Tirkiyeyê, girîng e. Banga Birêz Ocalan ruhê xwişk-biratî û aştiyê yê ku ji aliyê Alfred Nobel hatibû destnîşankirin, nîşan dide. Weke Xelatgirên Nobelê em vê hewldanê nas dikin û piştgirî didinê. Têkildarî destpêkirina jinûve ya danûstandinên aştiyê û weke nûner û lîderê siyasî yê rewa yê gelê Kurd Birêz Ocalan divê azad bibe û destûr were dayîn ku bi rengekî tam tevlî pêvajoya aştiyê ya dayî destpêkirin bibe; ev jî tê wê wateyê ku bikare bi parêzerên xwe, partiya xwe û hemû aktorên di pêvajoyên de cih digirin re bi azad peywendî çêbike.
Fikara Xelatgirên Nobelê yên ev nameya vekirî îmze kirine, ew e ku ti hewldana saziyên Ewropayê û Komîteya Mafên Mirovan a NYyê ji bo Birêz Ocalan xuya nake. Mafên Birêz Ocalan di çarçoveya Zagona Bingehîn a Tirkiyeyê û hiqûqa hundir, mewzûata Yekîtiya Ewropayê û hiqûqa navneteweyî de di bin ewlehiyê de ne; lê belê li gorî dîtinê evane hemû tiştekî îfade nakin.
Berpirsyariyên xwe bi cih bînin
Em bang li van saziyan hemûyan dikin ku ji bo parastina mafên Birêz Abdullah Ocalan berpirsyariyên xwe bi cih bînin. Em bang li Komîteya Wezîran a Konseya Ewropayê dikin ku biryara DMMEyê ya ku sala 2014an li dijî cezayên hepsa muebedê ya girankirî dayî, were bicihanîn û ‘mafê hêviyê’ jî were garantîkirin.
Banga aştiyê ya birêz Ocalan piştgiriyeke navneteweyî girtî ye
Banga aştiyê ya Birêz Ocalan ji Sekreteriya Giştî ya Neteweyên Yekbûyî heya gelek hikûmetên welatan, ji endamên Parlamentoya Ewropayê heya rêxistinên civakî yên sivîl ên li seranserî cîhanê di çapa berfireh de piştgiriyeke navneteweyî girtiye. Serokkomar Erdogan jî qebûl kiriye ku yekane rêya aştiyê ya di navbera gelên Tirk û Kurd de, diyalog û muzakereya bi Abdullah Ocalan re ye. Ev rewş bi hevdîtinên Osloyê (2009-2011) û pêvajoya Îmraliyê (2013-2015) re bi rengekî vekirî derketiye holê. Em daxwaz dikin ku Birêz Ocalan were berdan û bikare bi rengekî tam û bêastengî tevli pêvajoya aştiyê bibe.
Silav û Rêz,
Jody Williams, Xelata Aştiyê ya Nobelê (1997)
Dr. Şirîn Ebadî, Xelata Aştiyê ya Nobelê (2003)”
