Civînên gel li tax û gundan berdewam dikin. Di civînên gel de, welatiyên tev li civînê dibin, destnîşan dikin ku baweriya wan ji Rêberê Gelê Kurd heye, lê helwesta dewletê baweriyê nade. Welatî dixwazin ku di serî de Rêberê Gelê Kurd Abdullah Ocalan azad bibe.
Di civînan de sînevîzyona banga Rêberê Gelê Kurd Abdullah Ocalan û merasima çekşewitandinê bi eleqeyek mezin temaşe dikin.
Di pêşengiya TJA, DBP û DEM partiyê de civînên gel li tax û gundan berdewam dike. Di çarçoveya civînan de li Gundê Erûsekê Pasûrê û taxa Kooperatifê ya Bismilê civînên girseyî pêk hatin. Di civînê Gundê Ersekê yê Navçeya Pîranê bi tevlêbûna zêdetirî 100 kesan civîna gel pêk hat. Civînê bi rêzgirtinê dest pê kir. Pişte endamên dîwanê li ser pêvajoyê nirxandin kirin, li pirs û nirxandinên gel guhdar kirin. Civîn ji du beşan pêk hat. Di beşa ewil de pêvajo hat nirxandin û perspektifa Aştî û Civaka Demokratîk hat parvekirin. Di beşa duyemîn de jî hevşaredarên Pîranê li dîwanê rûniştin û li pirsgirêkên gel guhdar kirin.
Di herdu rûniştinan de jî beşdaran anîn ziman ku ew heta dawî li peş pêvajoya aştî û demokrasiyê ne û xwestin ku Rêber Apo û tevgera azadiyê êdî neyê xapandin. Dîsa xwestin ku êdî xwîn bes birije û dewlet hesabê zulma li kurdan hatiye kirin bide. Gundiyan xwest ku di serî de Rêberê Gelê Kurd Abdullah Ocalan azad bibe. Disa di beşa duyemîn de jî ji hevşaredaran xwestin ku êdî pirsgirêkên wan ên rê, goristan û xaniyên hatine xerakirin çêke.
Bismil
Li taxa Kooperatifê ya navçeya Bismilê jî bi tevlêbûna sedan kesan civîn pêk hat. Di civînê de sînevîzyona ku ji banga Rêberê Gelê Kurd Abdullah Ocalan a di 9ê Tîrmehê de hat parvekirin û merasima Koma Aştî û Civaka Demokratîk a şewitandina çekan hat temaşekirin. Girseya beşdarî civînê bû bi eleqeyek mezin sînevîzyon temaşe kir.
Erxenî/Çinar
Li tax û gundên Çinar û Erxeniyê jî di heman çarçoveyê de civînên gel bi girseyî pêk hatin. Di civînan de dîsa beşdaran xwest ku gavên şênber bên avêtin û girtiyên siyasî bêne berdan.
