Amed – Hevserokê MED TUHAD-FEDê Kerem Canpolat têkildarî merasîma îmhakirina çakan a Koma Aştî û Civaka Demokratîk diyar kir ku divê dewlet gavê PKKê wekî qelsî pênase neke û got: “Ev agir agirê aştiyê ye.”
Piştî banga 9ê Tirmehê ya Rêberê Gelê Kurd a bidîmen, 30 endam û rêveberên PKK û KCKê ji bo bersivê bide bangê, bi navê Koma Aştî û Civaka Demokratîk merasima çêkîmhakirinê pek anîn. Li Bakurê Kurdistanê jî gelek sazî, siyasetmendar, nivîskar û rojnameger tev li merasîma PKKê ya dîrokî bûn. Di nav wan kesan de Hevserokê Federasyona Komaleyên Hiqûq û Piştevaniyê yên Malbatên Girtî û Hikumxwaran a Medê (MED TUHAD-FED) Kerem Canpolat jî hebû. Kerem Canpolat têkildarî merasîmê ji Ajansa Welat (AW) re axivî.
‘Çavên cîhanê li wê merasîmê bû’
Kerem Canpolat diyar kir ku beşdariya merasîma Koma Aştî û Civaka Demokratîk gelek watedarbû û wiha axivî: “Her kes gelekî bi kelecan bû. Şeva beriya merasimê ji kelecanê gelek kes nekarîbû razê. Sibehî em çûn cihê merasîmê. Ji gelek cihên cuda gelek kes hatibûn. Çavên cîhanê li wê merasîmê bû. Di dîroka Kurdistanê de tiştekî wîsa cara yekemîn pêk hat. Dema gerîlayên PKKê hatin di nava beşderwanan de hem xemgînî hem jî coş hebû. Ev 50 sal in êşa şer gelek hat kişandin. Li vir jî ew êş hat xuyakirin. Hat hîskirin ku di rojên pêş de gavên mezin dê bêne avêtin. Dayîkên şehîdan jî li vir bûn. Kurdan gavên pir balkêş û mînak avêtin. Bi keda zarokan Kurdan Rojhilata Navîn dê bibe sedsala azadiyê.”
‘11ê Tirmehê bû agirê aştiyê’
Kerem Canpolat destnîşan kir ku ji welat ên cîhanê gelek kesên navdar hatin beşdarî merasimê bûn û wiha pê de çû: “Gerîlayên hatin tav li merasimê bûn, bawer bûn ku dê şer bê rawestandin. Bi xwe bawer bûn. Divê em jî wekî civak wê baweriyê bijîn. Divê kesên ku tev li merasîmê bûn ji îro şunde ji bo aştiyê sed katî bixebitin. Kesên ku şahîdên roja dîrokî bûne şev û rojên xwe bikin yek û ji bo çareseriya pirsgirêka Kurd bixebitin. Divê ev vîna ku çakên xwe avêtine agir bêne famkirin. Dîrok li vir hat nivîsandin. Kurdan bi agir Dehaqê zilmkar hilweşandin. 11ê Tirmehê jî bû agirê aştiyê.”
‘Divê komîsyon bên avakirin’
Kerem Canpolat anî ziman ku divê pirsgirêka Kurd di zagonan de were qebûlkirin û axaftina xwe wiha bi dawî kir: “Gûman di serê civakê de heye. Tiştên ku ji gelê Kurd hat xwestin gelê Kurd pêk anî. Ji niha û şûnde divê dewlet gav biavêje. Li meclisê hîn komîsyon ava nekiriye. Divê meclis komîsyonê ava bike û bixebite. Divê ev pirsgirêk li meclisê bê çareserkirin. Divê maf û çandê kurdan wekî fermî bê naskirin. Kurdan ji bo aştiyê her tişt kir. Divê ev merasim wekî qelsî neyê dîtin. Divê wekî vîna azad bê dîtin. Vînek derketiye holê. Dayîkên ku hestiyên zarokên xwe nedîtiye li vir aştiyê dixwestin. Divê dewlet jî wan tiştan bibînê. Kurdan her tiştî dît, lê tenê aştî neditine. Divê ev sedsal ji bo Kurdan bibe sedsala aştî û azadiyê.”
