Çalakiya nobetê ya li dijî êrişên ser Bakur û Rojhilatê Sûriyeyê li ser sînorê Nisêbîn-Qamişloyê hatiye destpêkirin di roja 3yemîn de bi dirûşmên berxwedanê didome.
Dewleta tirk û koma wê ya paramîlîter ANS êrişên xwe yên li ser Bakur û Rojhilatê Sûriyeyê didomînin. Li dijî van êrişan, li ser sînorê Nisêbîn-Qamişloyê çalakiya nobetê hatibû destpêkirin û nobet di roja 3yemîn de didome. Ji serê sibehê ve bi sedan kesan berê xwe dan qada nobetê. Girseya ku endamên Dayikên Aştiyê, xizmên girtiyan, siyasetmedar û welatî di nav de bi dirûşmên “Bijî berxwedana Rojava”, “Bedengî mirin e, berxwedana jiyan e”, “Xelkê Rojava bi tenê nîne” û “Jin, jiyan, azadî” çalakiya xwe domandin.
Piraniya çalakvanan jî jin û ciwan bûn û bi yekdengî stranên berxwedanê striyan.
Ji çalakvanan Dayika Aştiyê Gurbet Tekîn di çalakiyê de wiha got: “Divê dewlet êdî çav û guhên xwe vekin û ji vê zilma ser gelê kurd tê kirin re bibêjin bes e. Her roj jin, zarok û ciwan tên qetilkirin. Em dixwazin ev şer êdî xelas bibe. Em dixwazin aştî bê Kurdistan û dinyayê. Sedema tevahiya pirsgirêkan, tecrîda li ser Rêberê Gelê Kurd Abdullah Ocalan e. Hunermend, zanyar, pêşengên civakê divê berpirsyartiya xwe bi cih bînin. Bi azadiya Ocalan re ev şer dikare bi dawî bibe. Heta em encamekê bi dest dixin dê nobeta me bidome.”
Çalakgeran li cihê nobetê daxuyanî dan. Hevserokê DEM Partiyê yê Şirnexê Abdullah Gungen di daxuyaniyê de axivî û got: “Bakur û Rojhilatê Sûriyeyê bi komkujî û şerekî “bêexlaq” re rû bi rû ye. Ev şer, 13 sal in tê domandin. Herî dawî rejîma Baasê hilweşiya. Gelê Kurd li Rojava bi alîkariya dewleta tirk tê qetilkirin. Heke daxwaza wan a aştiyeke mayinde hebe, bila bi birêz Abdullah Ocalan re hevdîtinê bikin. Em ne alîgirên şer in. Em dixwazin ev şer bi dawî bibe. Em bi gelê Rojava re ne. Dê sedsala 21’emîn bibe sedsala Kurdan.”
Parlamenter George Aslan jî bal kişand ser sînorê Nisêbîn-Qamişloyê û wiha got: “Ji bo mirovan ji hev qut bikin ev sînor danîn lê nekarîn. Mayin çandin û bi sedan kesan jiyana xwe ji dest dan lê dîsa jî nekarîn. Xelkê wir ji xwe re rêveberiyek ava kir. Lê niha dixwazin wê rêveberiyê tune bikin.”
Aslan, destnîşan kir ku xelkê Bakur û Rojhilatê Sûriyeyê îradeya pêkvejiyanê nîşan daye û ji bo vê bedel daye. Aslan, wiha bi dawî kr: “Heke îktîdara Tirkiyeyê li dostan bigere, wê demê bila destê xwe dirêjî Kurdan bike. Kurd bihêz in, amade ne. Têkiliyên xwe yên bi Kurdan re pêş bixin. Divê helwesta hikûmetê, ji bo demokratîkbûna Sûriyeyê be. Lê di halê hazir de tiştekî wiha xuya nake.”
