DFGê 3yemîn Kongreya xwe ya asayî bi dirûşma “Çapemeniya Azad Civaka Azad” pêk anî. Di Kongereyê de Kesîra Onen û Selman Çîcek wek hevserok hatin hilbijartin.
Komeleya Rojnamegeran a Dîcle Firatê (DFG) 3yemîn Kongreya xwe ya asayî pêk anî. Kongre bi dirûşma “Çapemeniya Azad Civaka Azad” li ÇandAmedê pêk anî. Hevserokê Partiya Herêmen Demokratîk (DBP) Keskîn Bayindir, hevşaredarên Bajarê Mezin û navçeyên navendê yên Amedê, endam û nûnerên saziyên civakî, dayîkên aştiyê û gelek rojnameger tev li kongereyê bûn.
Wêneyên rojnamegerên şehîd Mûsa Anter, Gurbetelî Ersoz, Gulistan Tara, Denîz Firat, Nagehan Akarsel, Cengîz Altûn, Hafiz Akdemîr, Metîn Goktepe, Hirant Dînk, Nûjiyan Erhan, Nazim Daştan, Cihan Bîlgîn, Azîz Koyluoglû, MAzlûm Erencî û Egîd Roj li eywanê hatin daliqandin.
Kongre ji bo rojnamegerên ku hatine kuştin bi deqîqeyek rezgirtinê destpê kir. Pişt re nûmerê DFGê yê Wanê rojnameger Adnan Bîlen axaftina destpêkê kir.
‘Em ê di rêya şehîdan de bin’
Adnan Bîlen da zanîn ku kedkarên çapemeniyê gelek berdêlên giran dan û wiha axivî: “Gelek hevalên me hatin qetilkirin, me gelek şehîd dan. Em li ser bîranîna wan vê kongereyê pêk tînin. Têkoşîna me xwedîlêderketina heqîqêtê ye. Em ê her tim di rêya şehîdan de bin.”
Paşê sînevîzyon hat temaşekirin û dîwan hat hilbirjartin.
‘Em ê rol û mîsyona xwe pêk bînin’
Li ser navê dîwanê Rojnameger Serdar Altan diyar kir ku tevahiya pirsgirêkên li Kurdistan, Tirkiye û Rojhilata Navîn ji bo bên çareserkirin û rastî di bin tariyê de nemînin ew karê xwe dikin û wiha got: “Dema ku me destpê kir em 10-15 kes bûn lê îro em bûne 300 kesî. Ji bo rol û mîsyona xwe em pêk bînin dîve em kar û xebatên xurt bimeşînin. Ya girîng ew e ku em ê piştî niha çi bikin û ev kongre dê bibe bersiva vê yekê.”
‘Hevalên me yên bi SÎHAyan hatinê kuştin dê her tim bijîn’
Paşê Hevseroka DFGê Dîcle Muftuogluyê diyar kir ku li vir wenêyen hevalên şehîd hene û wiha got: “Di sala 2019yan de me dest bi karê DFGê kir. Me ala Apê Musa, Nagîhan Akarselê rakir. Berî 30 salan dema ku me dest bi karê xwe kir, gelê Kurd di bin qirkirinê de bû. Lê gelê Kurd heke îro jiyana xwe berdewam dike ev saya hevalên me yên rojnameger ên ku şehîd ketine ye jî. Di salên 90î de hevalên me li kolanan dihatin kuştin ji bo ku heqîqêtê holê rakin. Dema ku em hatin salên 2010an, rewş hat guherandin em girtinê re rû bi rû man. Îro jî hevalên me bi SÎHAyan tên kuştin. Hevalên me yên ku hatine kuştin dê bijîn. Em ê xwedî li têkoşîna wan derkevin.”
‘Em alên şehîdan li erdê nahêlin’
Paşê rojanemeger Huseyîn Aykol destnîşan kir ku vê meşê berî 35 salan destpêkir û wiha bi lev kir: “Eger hevalên me tunebûna me tu carî nedikarî rastî derxista holê. Heke ev 35 sal in ez li vir bim ji bo ala hevalên şehîd li erdê nemîne ye. Çawa ku roja sereke me dest bi karê xwe kiribû em ê welê berdewam bikin. Em ê dijî mirinê karê xwe berdewam bikin. Heta mirinê jî ez ê li vir bim.”
Paşê Hevşaredarê Bajarê Mezin ê Amedê Dogan Hatun diyar kir ku karê rojanemegeriyê ji bo pêvajoyê gelek girîng e û anî ziman ku gelek hewcedarî bi rojnemegeran heye. Dogan Hatun da zanîn ku çapemenî azad be civak jî azad e.
‘Civaka azad dê bi çapemeniya azad pêk bê’
Dû re Hevserokê Giştî yê DBPê Keskîn Bayindir bi bîr xist ku çapemeniya azad parêzvaniya gelê Kurd dike û wiha got: “ Li cîhanê ragihandin pêş ketiye. Desthilatdar jî gelek giringî didin çapemeniyê. Bi keda çapemeniya azad tiştên ku li Kurdistanê diqewimin digihêjin her derê. Civakeke azad dê bi destê çapemieniya azad derkeve holê.”
Kongreyê bi xwendina raporan berdewam kir.
Di dawiyê de hilbijartin pêk hat. Kesîra Onen û Selman Çîcek weke hevserokên DFGê hatin hilbijartin.
Hevserok Selman Çîcek destnişan kir ku ew vê kongereyê diyarî şehîdan dikin.
