Wan – Dayika Aştiyê Saîde Ûlûgana ku 2 zarokên xwe di nava tevgera azadiyê de winda kiriye, piştgirî da “Banga Aştî û Civaka Demokratîk” û da zanîn ku zêde baweriya wan bi dewletê nayê, lê dîsa jî hêvî dike ku aştî pêk bê.
Dayika Aştiyê Saîde Ûlûgana ya ku 2 zarokên wê di nava tevgera azadiyê ya Kurd de jiyana xwe ji dest dane, piştgirî da “Banga Aştî û Civaka Demokratîk” a Rêberê Gelê Kurd Abdullah Ocalan. Gelek xizmên Saîde Ûlûgana di Komkujiya Geliyê Zîlan de hatine kuştin û sirgûnkirin. Du zarokên Saîde Ûlûgana jî di nava Partiya Karkerên Kurdistanê (PKK) de di şer de jiyana xwe ji dest dane. Zarokên Saîde Ûlûgana, Aynûr Ûlûgana (Ronahî Tamara) di 29ê Nîsana 2021an de li navçeya Lîcê ya Amedê, Ridvan Ûlûgana (Karker Tolhildan) jî di 10ê Hezîrana 2023yan de li Efrînê jiyana xwe ji dest didin. Dayik Saîde Ûlûgana banga aştiyê kir û gumanên xwe anî ziman.
Gelek xizmên wê di Komkujiya Zîlanê de hatine kuştin
Gelek xizmên Saîde Ûlûgana di Komkujiya Geliyê Zîlan de hatine kuştin. Bapîrê wê, apê wê, bavê xezûrê wê û gelek kesên din yên ji malbatê jî hatine sirgûnkirin. Gelek ji van jî di Girtîgeha Edeneyê de jiyana xwe ji dest dane. Saîde Ûlûgana da zanîn ku pêşiyên wan jî ev zilm û zordarî kişandiye û heta niha jî ev yek didome. Saîde Ûlûgana diyar kir ku du zarokên wê jiyana xwe ji dest dane û got: “Her du zarokên min jî sala 2007an de tev li bûn. Ronahî 1ê Nîsanê saet 9ê sibê ji malê derket û çû. Karker jî wî çaxî li Eskîşehîrê zanîngeh dixwend. Ew jî 2 meh piştî Ronahiyê tev li bû.”
2 zarokên wê bûne cangoriyê azadiyê
Saîde Ûlûgana diyar kir ku keça wê Aynûr Ûlûgana dawiya pandemiyê di meha nîsanê de li navçeya Licê jiyana xwe ji dest daye û wiha got: “Me ji bo hilgirtina cenaze serî lê da, lê cenaze nedan me. 3 mehan em li dû geriyan û dû re li me geriyan. Em çûm me caneze anî û me veşart. Karker jî li navçeya Şehbayê ya Efrînê şehîd ket. Min bawer nedikir ku şehîd bûye, partiyê jî ewilî parve nekir. Me ji medyaya dewletê bihîst, lê me ji wan bawer nekir. Piştî salekê partiyê şehadeta Karker ragihand.”
‘Me dîtiye bila tu kesên din nebîne’
Saîde Ûlûgana derheqê pêvajoyê de jî anî ziman ku ew dixwazin ev pêvajoya bi ser bikeve û ev yek anîn ziman: “Mirov hinekî jî dewletê bawer nake, lê dîsa jî hêvî dikim çêbibe. Weke zarokên min bi hezaran şehîd ketine. Hêvî dikim aştî pêk bê û ti kes negirî. Yên niha li serê çiya ew jî zarokên me ne. Zêde baweriya min nîn e, lê dîsa jî ez aştiyê dixwazim. Mirov ji dewletê bawer nake, bila dayikên gerîla û leşker, polîsan rabin û doza aştiyê bikin. Gelek xwîn hat rijandin, mezelên gelek kesan nediyar e. Ez jî niha meraq dikim ka mezelê Karker li ku ye, em vê êşê dikişînin, bila êdî tu kesên din vê êşê nekişînin.”
