Amed – Endamê Komeleya Koçê Mîrza Korkmaz têkildarî valakirina gundan û pêvajoyê diyar kir ku divê dewlet astengiyên li ser vegera gundan rakê.
Di salên 1990an de bi hezaran gundên Kurdistanê hatin şewitandin û valakirin. Rayedarên dewletê nehiştin ku gundî amurên xwe ji malê derxin. Bi milyonan kes koçî bajarên Kurdistanê û Tirkiyeyê bû. Kurdên ku ji gundên xwe koçber bûne, dixwazin vegerin warê xwe. Lê îro gelek herêm ji aliyê dewleta Tirk ve hatiye qedexekirin. Têkildarî şewitandina gundan û pêvajoyê endamê Komeleya Lêkolîn û Çavdêriya Koçberiyê ya Mezopotamyayê Mîrza Korkmaz ji Ajansa Welat (AW) re axivî.
‘Valakirina gundan politîkaya dewletê bû’
Endamê Komeleya Koçberiyê Mîrza Korkmaz diyar kir ku banga “Aştî û Civaka Demokratîk” bandora xwe li her derê kir û got: “Di salên 90î de nezî 4 hezar gund hatin şewitandin. Pêvajo û ev bûyer bi hevre girêdayî ne. Banga Rêberê Gelê Kurd hêvî da civakê. Koçberî ji avakirina komarê heta îro wekî plana dewletê ya valakirina erdnigariya Kurdistanê ye. Gund û xwezeya Kurdan hat valakirin. Di sala 1925a de wextê Şex Seîd bi plana Şark û Îslahatê û paşê di sala 1934an de jî Qanûna Îskanê derket û valakirina erdnigariya Kurdistanê dest pê kir.”
‘Hêj jî gelek herêm tên qedexekirin’
Mîrza Korkmaz da zanîn ku di sala 1927an de 13 milyon nifûsa Tirkiyeyê hebû û wiha berdewam kir: “Rayêdarên wê demê xwestin li 11 bajarên Kurdistanê kurdan koçberî bajarên Tirkiyeyê bikin. Li aliyê din tirk anîn Kurdistanê. Heta serhildana Dersimê û paşê jî di salên 90î de gelek gund valakirin. 5 milyon Kurd koç bûn. Erd û malên wan vala man. Piştî banga “Aştî û Civaka Demokratîk” gelek bar dikevê li ser mile dewletê. Divê dewlet ji bo koçberan jî gavan biavêje. Gundî hîna nikarin vegerin gundên xwe û rê li wan girtî ye. Divê rê li gundiyan bê vekirin. Hîna li Şirnex û Colemergê û gelek cihên din herêm qedexe ne. Ji bo aştî pêş bikeve divê dewlet li wan mijaran gav biavêje.”
Divê lêborînê bixwazin
Mîrza Korkmaz, da zanîn ku ji bo aştî pêk bê divê Rêberê Gelê Kurd Abdullah Ocalan azad bibe û wiha bi dawî kir: “Welatê me welatêkî dîrokî ye. Divê her kes vegere axa xwe. Çend sal in em ji warê xwe dûr ketine. Îro divê xwedî derketineke xurt hebe. Divê her kes li banga “Aştî û Civaka Demokratîk” xwedî derkevin. Divê gelê Kurd li warê xwe xwedî derkeve. Ev xwedî derketin dê bandorê li pêvajoyê bike. Divê dewlet astengiyan ji holê rakê. Cihên ku navê vê hatiye guherandin divê dîsa navê berê li wan bikin. Ji bo aştî pêk bê divê Rêberê Gelê Kurd Abdullah Ocalan azad bibe. Bi hezaran kesan di şer de jiyana xwe ji dest dan. Divê dewlet vê rastiyê bibîne û gavan bavêje. Divê kurdên koçber bûne jî ji bo vegerê xwe amade bikin.”
