Berdevka DEM Partiyê Ayşegul Dogan got: “Em amadekariyê dikin ku di demek nêz de serdana Girava Îmraliyê bikin.”
Berdevka DEM Partiyê Ayşegul Dogan li navenda giştî ya partiya xwe civîna çapemeniyê li dar xist û geşedanên di rojevê de nirxand. Ayşegul Dogan diyar kir ku ew civîna xwe ya rêveberiya navendî li dar dixin û mijara nîqaşa wan sereke avakirina komîsyona li Meclîsê ye û got: “Divê li Meclisê gavek beriya gavekê komîsyon were avakirin.”
Ayşegul Dogan anî ziman ku pirsgirêka Kurd tenê ne pirsgirêka Kurdan e û ew ji bo çarserkirina pirsgirêkê amadekariyan dikin.
Dê hevdîtinên li gel partiyan bidomin
Ayşegul Dogan destnîşan kir ku partiyên muxalefetê yên ku ew bi wan re civiyan e daxwaza “têkiliya rasterast, ragihandin, agahdarkirina li ser mijarê û zelaltiyê” dikin. Ayşegul Dogan diyar kir ku ew bi AKP û MHP re jî civiyan e û ev hevdîtin dê berdewam bikin û got: “Em ne tenê bi partiyên siyasî yên ku di Parlamentoyê de temsîl dikin re hevdîtin dikin. Hevdîtin berdewam dikin û dê bi partiyên siyasî yên cuda yên ku di Parlamentoyê de temsîl nîn in re jî berdewam bikin. Ev hevdîtin dê di serdema nû de jî berdewam bikin. Piştî van hevdîtinan daxuyaniyên nivîskî hatin dayîn.”
‘Em ê di demek nêz de biçin hevdîtinê’
Ayşegul Dogan bal kişand ser hevdîtinên li gel Abdullah Ocalan û wiha got: “Em wekî DME PartiyÊ jî amadekariyan dikin ku biçin Girava Îmraliyê. Em plansaziya vê yekê dikin ku tavilê serdana Girava Îmraliyê bikin. Em bi şandeyek ku ji endamên Rêveberiya Navendî ya partiya me, tevî hevserokên me pêk tê biçin Girava Îmraliyê. Em amadekariyan dikin ku rasterast bi birêz Ocalan re hevdîtin bikin û şêwir bikin da ku vê serdemê fam bikin û rave bikin û bi hêztir xwe birêxistin bikin. Em ê wekî şandeyek Partiya DEM di demek herî nêz de serdana wî bikin. Dîsa pir îhtîmal e ku birêz Ocalan di rojên pêş de bi nûnerên partiyên siyasî yên cuda re jî hevdîtinê bike.”
‘Birêz Ocalan dixwaze bi Barzanî, Ebdî û Talabanî re hevdîtinê bike’
Ayşegul Dogan axaftina xwe domand û ev yek anîn ziman: “Dema em giranî û berfirehiya pirsgirêkê li ber çavan digirin; em difikirin ku dê ji bo birêz Ocalan sûdmend be ku bi birêz Mesut Barzanî, birêz Nêçîrvan Barzanî, birêz Mazlum Ebdî, birêz Qubat û Bafil Talabanî re hevdîtinan bike. Em jî dizanin ku ew dixwaze van hevdîtinan bike. Em dixwazin vê yekê bi raya giştî re parve bikin. Ev daxwaza birêz Ocalan e. Em jî difikirin ku dê ev yek sûdmend be. Ji bo wî pir hêja û girîng e ku bi serokên ji partiyên siyasî yên cuda û kesayetên girîng re were cem hev. Ev ji bo pêvajoya siberojê jî pêwîstî ye.”
