Mehmet Çelîk ku piştî 30 sal û 6 mehan ji hefsê hate berdan, li warê xwe Amedê bi dirûşma “Bijî berxwedana zindanan” hate pêşwazîkirin.
Mehmet Çelîk (50) ku li Girtîgeha Hejmar 1 a Kandirayê dihat ragirtin û piştî 30 sal û 6 mehan di 3yê Hezîranê de hate berdan, li warê xwe Amedê bi coşeke mezin hat pêşwazîkirin. Çelîk li Otogara Amedê ji hêla malbata xwe û nûnerên rêxistinên civaka sivîl û partiyên siyasî ve hate pêşwazîkirin. Çelîk ku bi tîlîliyan û berzkirina dirûşma “Bijî berxwedana zindanan” hate pêşwazîkirin, yek bi yek hemû kes silav kir.
Çelîk spasiya kesên hatin pêşwaziya wî kir û got ku ji ber berdanê kêfxweş e. Çelîk diyar kir ku li girtîgehan hê jî gelek girtî hene. Çelîk piştî axaftinê derbasî malê ya li navçeya Rezanê bû.
Mehmet Çelîk, di sala 1994an de li Mêrsînê hate binçavkirin û dadgehê bi îdiaya “Xerakirina yekitî û yekparetiya dewletê” cezayê muebedê lê birî. Çelîk li girtîgehên Konya, Burdur, Semsûr, Bolu, Îzmîr, Sêwereg û Rihayê hate ragirtin. Diviyabû Çelîk di Kanûna 2024an de bihata berdan lê tehliyeya wî bi hinceta ku zexta “poşmantiyê” red kiriye, ji bo 6 mehan hate astengkirin.
