Serokê Fraksiyona YNKê ya li Parlamentoya Iraqê Herêm Kemal Axa têkildarî dorpêça Mexmûrê û binçavkirina şandeya Mexmûrê de nirxandin kir û got: “Bandora welatên cîran di binçavkirina şandeyê de heye.”
Iraq ji 10ê Nîsanê ve rê nade kel û pel bikevin nava wargehê, rê nade karker biçin ser karên xwe û nasnameyên xelkê wargehê nû nakin. Bi wê ve girêdayî şandeya ku Hevserokê Meclisa Gel a Wargeha Penaberan ya Şehîd Rûstem Cûdî Ehmed Şehbaz, Hevşaredarê wargehê Edban Yilmaz û Hevberdevkê Komîteya Têkiliyan Derve ya wargehê Bêwar Emîn pêktên ku ji bo çareserkirina pirsgirêkên wargehê di 14ê Gulanê de serdana Bexdayê kiribûn, piştî ku hevdîtin bi wezîrê Edaletê re pektînin de tên girtin. Nûnerên wargehê tevî sozên rayedarên Iraqê hîn jî nehatine berdan. Serokê Fraksiyona YNKê ya li Parlamentoya Iraqê Herêm Kemal Axa derbarê binçavkirina nûnerên wargehê ku li Bexdayê hatine binçavkirin de, ji ROJNWESê re axivî.
Kemal Axa anî ziman ku nedixwestin şandeya wargeha Mexmûrê serdana Bexdayê bike û civîn pêkînin û wiha got: “Lê dema serdana Bexda kirin û wêneyê wan belav bû, piştre ji aliyê Fermandariya Hêzên Hevbeş ya Iraqê ve hatin binçavkirin. Pêwîst bû ew şande nehatiba binçavkirin. Diyare beriya vê fermanek nivîskî ji Rêveberiya Operasyonên Hevbeş hatibû derxistin. Li gorî wê fermanê divê rê li niştecihên nav wargehê bê girtin ku neçin Bexda û derve. Me ji bo sererastkirina vê biryarê kar kir, lê diyare bandora welatên derve li ser vê biryarê hebû.”
Herêm Kemal Axa da zanîn ku rêgirtina li nexweş û xelkê wargeha Mexmûrê ya ji bo derve, karek xirabe.
