Serokwekîla Koma DEM Partiyê Gulistan Kiliç Koçyîgît, bal kişand ser êrişên dewleta tirk ên li ser Bakur û Rojhilatê Sûriyeyê û wiha got: “Hûn nikarin li hundir destê aştiyê dirêj bikin û li aliyê din ê sînor bombeyan li kurdan bibarînin.”
Serokwekîlên Koma Partiya Wekhevî û Demokrasiyê ya Gelan (DEM Partî) Gulistan Kiliç Koçyîgît û Sezaî Temellî û parlamenteran, li Meclisê êrişên dewleta tirk û komên wê yên paramîlîter ên li ser Bakur û Rojhilatê Sûriyeyê protesto kirin. Çalakî, li Deriyê Çapemeniyê yê Meclisê hat lidarxistin. Di çalakiyê de dowîzên “Şoreşa Rojava şoreşa jinê ye”, “Bijî berxwedana Rojava”, “Rojava rûmeta me ye” û “Gelên Rojava bi tenê nînin” hatin hilgirtin.
Xetereyên li ser gelan mezin dibin
Sezaî Temellî di çalakiyê de axivî û got ku têkçûna rejîma Esad ji bo gelên Rojhilata Navîn hêvî ye lê ew ji bo gelên Sûriyeyê gelek bihêvî nînin. Temellî, bal kişand ser helwesta Tirkiyeyê ya di mijara Sûriyeyê de û got: “Geşedanên li Sûriyeyê, krîza heyî mezin dike û xetereyên li ser gelan mezin dike.”
Sezaî Temellî, diyar kir ku ji bo aştiya Tirkiyeyê û bidawîbûna krîzên li Rojhilata Navîn divê pevçûn bi dawî bibin û divê Tirkiye jî di vê çarçoveyê de gavan biavêje. Temellî, ji bo gotina Wezîrê Karên Derve Hakan Fîdan ku gotibû “xwe hinek nû bikin” jî ev bersiv da: “Em jî ji wezîrê karên derve re dibêjin ku tişta divê were nûkirin polîtîkaya we û feraseta we ye. Tevî krîza 13 salan a li Sûriyeyê jî we ji xwe re ders negirtine û hûn hewl didin bêîstîqrariyê bidomînin. OSO, SMO berhemên DAIŞ, El Nusra û rêxistinên din ên terorê ne. Hûn bi van re siyasetê ava dikin û ev yek deraqilî ye. Tekane hêza ku li wir dikare demokratîkbûnê pêk bîne û rê li ber îstîqrarê veke, Hêzên Sûriyeya Demokratîk in. Guftûgo, aştî û pêvajoyeke muzakereyan a bi wan re dê ji bo pêşeroja Sûriye û herêmê baş bibe. Heke hûn qala nûbûnê bikin, tam jî li vir lê bigerin. Yên vê herêmê hedef digirin, dê li dîwar biqelibin û dê bibin mehkûmên çiravê.”
‘Li Bakûr Rojhilatê Sûriyeyê xetereya DAIŞê mezin bû’
Temellî, wiha domand: “Li Bakur û Rojhilatê Sûriyeyê careke din xetereya DAIŞê mezin bû. Sedema vê jî hedefgirtina Bakur û Rojhilatê Sûriyeyê ye. Lê em li Sûriye û Tirkiyeyê aştiyê dixwazin. Rêya aştiyê jî gavavêtina Tirkiyeyê ye. Ji 1’ê Cotmehê ve ye hûn qala destê aştiyê dikin. Heke daxwaza we ya vekirina deriyên guftûgoyê hebe, wê demê ji ewil deriyên Îmraliyê vekin. Bi vê re bila rêya aştiyê li Tirkiye û herêmê vebe. Em careke din bang li desthilatê dikin; ji vê polîtîkaya xwe ya xelet vegerin û ji bo tifaqa kurd-tirkan rêya aştiyê vekin.”
Temellî, bang li partiyên muxalefetê jî kir ku polîtîkaya hundir û derve bi hev re binirxînin û li cem gelên kurd û tirk û kedkaran cih bigirin.
Li Sûriyeyê gelek sûcên şer tên kirin
Gulistan Kiliç Koçyîgît jî bal kişand ser geşedanên li Sûriyeyê û got ku ji bêdengiya desthilatê ya li hemberî HTŞê dibînin ku têkiliya wan pê re heye. Gulistan Kiliç Koçyîgît, got ku ji 8’ê Kanûnê ve li Sûriyeyê gelek sûcên şer tên kirin, Elewî tên qetilkirin û înfazkirin. Gulistan Kiliç Koçyîgît, diyar kir ku divê Tirkiye li Sûriyeyê ne xwedî roleke rê li ber bêîstîqrariyê vedike be lê divê ji bo aştiyê û demokratîkbûnê rol bilîze. Gulistan Kiliç Koçyîgît, anî ziman ku divê bi hemû gel, civak û derdorên cuda re guftûgo bên pêşxistin û ev tevek di pêşeroja Sûriyeyê de xwedî gotin bin. Gulistan Kiliç Koçyîgît, got ku Tirkiye di halê hazir de xwedî roleke ku êşên heyî mezintir bike ye.
‘Ferqa êrişkirina Kobanê, Qamişlo û kurdên li vir nîne’
Gulistan Kiliç Koçyîgît, wiha domand: “Tirkiyeyê, koma SMOyê ku demekî dirêje xweyî dike û alîkariya çavkanî, lojîstîk, leşkerî û siyasî dide wan, bi ser Kurdan de şandiye. Ma we dîtiye ku SMOyê bi HTŞê re şer kiriye? Naxêr. Tenê li dijî Kurdan şer dike. Êrişî xaka Kurdan dikin. Ev yek nîşan dide ku kurdfobiya Tirkiyeyê bingeha hemû polîtîkayên wê ye. Ev jî xizmetê ji çareseriya pirsgirêkan re nake. Li Bakur û Rojhilatê Sûriyeyê bedelên giran hatin dayin. Tu ferqa êrişkirina Kobanê, Qamişlo û Hesekê û kurdên li vir nîne.
‘Hûn nikarin qala aştiyê bikin û li derve êrişî kurdên Rojava bikin’
Hûn nikarin li hundir qala aştiyê bikin û li derve êrişî kurdên Rojava bikin. Hûn nikarin li hundir destê aştiyê dirêj bikin û li aliyê din ê sînor bombeyan li kurdan bibarînin. Heke hûn bixwazin pirsgirêkê çareser bikin, heke daxwaza we ya aştî û çareseriyê hebe, wê demê hûn mecbûr in destê kurdên li Tirkiyeyê û yên li Rojava bigirin.
‘Em van komkujiyan qebûl nakin’
Her carê banga ‘Em dixwazin bi Tirkiyeyê re guftûgoyê bikin, pirsgirêka me bi Tirkiyeyê re nîne’ dikin. Li şûna guhên xwe bigirin, lê guhdar bin. Kurdên li Rojava û gelên din ji bo Tirkiyeyê gef nînin. Ewlehiya sînor ne bi top û SÎHA’yan, bi polîtîkaya aştiyê dibe. Em van komkujiyan qebûl nakin. Çeteyên SMO’yê paşve bikişînin.
Weke DEM Partiyê em ê li dijî êriş û komkujiyên çeteyên SMO’yê li qadan bin. Em ê bi tu awayî rê nedin pêvajoyeke nû ya komkujiyan. Em ê bêdeng nemînin. Qada ezmûna aştiya Tirkiyeyê, Rojava ye. Nêzikatiya we ya li hemberî wan Kurdan, dê cidîbûna we nîşan bide.”
