Tevgera Jinên Azad (TJA) di 28-29ê Gulanê de li Amedê 1emîn Konferansa Parlamenterên Jin ên Kurd li dar bixe.
Di 28-29ê Gulanê de li Amedê dê bi pêşengiya Tevgera Jinên Azad (TJA) û bi dirûşma “Em siyasetê demokratîk bikin civaka demokratîk ava bikin” Konferansa Parlamenterên Jin ên Kurd were lidarxistin. Tê payin ku ji her çar parçeyên Kurdistanê, Iraq û welatên Ewropayê jî wekîlên berê û yên niha beşdarî konferansê bibin. Yên nayên jî dê bi rêya telekonferansê tev lê bibin.
Endama TJAyê Çaglar Demîrel ji ANHAyê re axivî û diyar kir ku konferans encama kedeke mezin e. Çaglar Demîrel, diyar kir ku armanca wan a ji konferansê ew e ku polîtîkayeke hevpar diyar bikin û xebateke hevpar a ku dê têkoşîna jinan derxîne holê bixin meriyetê. Çaglar Demîrel anî ziman ku li cîhanê û Rojhilata Navîn zîhniyeta mêrê serdest û netewe dewlet biryara şer didin û herî zêde jin ji vê bandor dibin û got: “Ji bo li dijî feraseta netewe dewletê bi siyaseta demokratîk bersivê bidin û ji bo pratîzekirina têkoşîna hevpar a jinan, hewcehî bi vê konferansê dîtine.” Çaglar Demîrel, anî ziman ku li Rojhilata Navîn jin di malan de tên hefsîkirin, tev li mekanîzmayên biryardayînê nayên kirin û got: “Rol û riseke girîng a jinên Kurd li dijî ve pergalê heye. Li Rojava şoreşa jinê heye. Ev şoreş, li Rojhilata Navîn û cîhanê bû modêl. Armanca me ew e ku li dijî şer em bi hev re li ser siyaseta demokratîk, civaka demokratîk, avakirina aştiyê û rê û rêbazên ve biaxivin. Em dixwazin xeta têkoşîna hevpar a li dijî vê pergalê bi hev re diyar bikin. Em jinên Kurd dixwazin bikin ku jin di mekanîzmayên biryardayînê de cih bigirin û têkoşîneke hevpar li dijî zîhniyeta nêrza ava bikin.”
Çaglar Demîrel, da zanîn ku ji her çar parçeyên Kurdistanê û ji welatên weke Danîmarka, Hollanda, Swîsre, Almanya û hwd. dê wekîlên Kurd tev li konferansê bibin û got: “Ji ber qedexeyên Tirkiyeyê dê nekarin bi awayekî fîzîkî tev li bibin. Ji Başûr û Iraqê nêzî 60 parlamenter dê tev li bibin. Dê wekîlên berê jî tev li bibin. Ji Leyla Zana heta roja me dê wekîlên di siyaseta demokratîk de cih girtin tev li bibin. Wekîlên li sirgunê jî hene. Ew jî dê online tev lê bibin.”
Çaglar Demîrel, da zanîn ku dê hewl bidin nîqaşên xwe xeteke têkoşîna hevpar diyar bikin û wiha pê de çû: “Her wiha li gorî me dê ji bo mijara yêkitiya neteweyî ya jinên Kurd jî bibe gavekî baş. Dê jinên Kurd pêşengtiya yekitiya neteweyî bikin. Her wiha dê atolyeyên me hebin.”
Çaglar Demîrel, têkildarî “Banga Aştî û Civaka Demokratîk” a Rêberê Gelê Kurd Abdullah Ocalan jî ev tişt anî ziman: “Dê fikra hevpar, pratîka hevpar û xeta têkoşînê ya hevpar jî di konferansê de bên diyarkirin. Yek ji rojeva me jî ew e bê ka dê siyaseta demokratîk ji vir û şûnde çawa bikeve meriyetê. Têkildarî şêweyê avakirina civaka demokratîk, em ê hewl bidin xetekî têkoşîna hevpar ava bikin.”
Çaglar Demîrel herî dawî wiha got: “Dê di roja duyemîn de jî atolye bên lidarxistin. Di encama nîqaşan de dê danezan bê amadekirin. “Di konferansê de dê hedef jî were zelalkirin. Di serdemeke ku netewe dewlet jinan tune dihesibîne, nasname, ziman û çanda Kurdan înkar dike de em ê yekitiya xwe û ziman, çand û nasnameya xwe çawa bijîni, em ê vê diyar bikin. Em ê bi beşdariya hemû hevalên jin, danezana xwe bi raya giştî re parve bikin.”
