Amed – Hevserokê MEBYA-DERê Mehmet Emîn Kiliç ku biryara kongreya PKKê nirxand wiha got: “Tevgera Azadiyê bi vê biryarê li Rojhilata Navîn rûpeleke nû vekir. Divê dewlet jî destûra bingehîn li gorî aştiyeke mayînde biguherîne.”
PKKê piştî “Banga Aştî û Civaka Demokratîk” a ku Rêberê Gelê Kurd Abdullah Ocalan di 27ê Sibatê de kir, di 1ê Adarê de agirbest îlan kir. Piştre di 5-7ê Gulanê de kongreya xwe pêk anî. PKKê di 12ê Gulanê de biryarên dîrokî yên kongreya xwe aşkere kirin. Hevserokê Komeleya Yekitî, Çand Piştevanî û Alîkariyê ya bi Malbatên li Derguşa Şaristaniyê Xizmen Xwe Windakirine re (MEBYA-DER) ya Amedê Mehmet Emîn Kiliç têkildarî biryarên kongreya Partiya Karkerên Kurdistan (PKK) ji ajansa me re axivî.
‘Biryarên kongreya PKKê li dinyayê deng veda’
Mehmet Emîn Kiliç diyar kir ku biryarên kongreya PKKê li dinyayê deng veda û wiha got: “Em tev pê memnûn in. Ev biryar ji aliyê malbatên şehîdan ve jî pir rast hate pêşwazîkirin. Ji ber ku malbatên şehîdan naxwazin êdî hesirên çavên dayikan biherikin û xwîn bê rijandin. Hemû alîgirên sekinandina şer in. Ev biryar gelek di cih de bû em jî dipejirînin û pîroz dikin. Tevgera Azadiyê bi vê biryarê li Rojhilata Navîn rûpeleke nû vekir.”
‘Em weke MEBYA-DER bi vê biryarê re ne’
Mehmet Emîn Kiliç da zanîn ku wexta ku şer hebû xebatên saziyên sivîl jî bi vê hincetê dihatin astengkirin û wiha berdewam kir: “Gel jî bi hinceta hebûn şer dihate astengkirin. Lê piştî vê biryarê êdî tu sazî nikarin hincetekê deynin holê. Barê vê têkoşînê kete ser milê gel û saziyan. Divê gel û sazî wî barî hilgirin. Malbatên şehîdan jî heta ev têkoşîn encam bigire dê têbikoşin. Weke MEBYA-DER û malbatên şehîdan em bi vê biryarê re ne û tişta ku bikeve ser milê me em ê bikin. Dayikên leşker û polîsan di axaftinên xwe de heyfê dixwazin. Dayikên şehîdan berovajiyê vê dibêjin ‘bila şer nebe’. Hemû alîkarên vê pêvajoyê ne ku xurt bikin û dengê wê bilind bikin. Tişta ketiye ser milê PKK wê kiriye divê ji niha şunde dewlet gavan biavêje. Dewlet êdî neçare hin gavan biavêje. Heke neavêje vê carê êdî hemû berpirsyartî dê ya dewletê be. Daxwaza me ya malbatên şehîdan ev e divê dewlet demildest vî miletî agahdar bike, bi awayekî wêrek gavan biavêje. Ma kî heye ku aştiyê û aramiyê qebûl neke.”
‘Divê dewlet şertên birêz Abdullah Ocalan baş bike’
Mehmet Emîn Kiliç, destnîşan kir ku divê dewlet beriya her tiştî şertên Rêberê Gelê Kurd Abdullah Ocalan ên xebatê baş bike û ev tişt gotin: “Divê girtiyên siyasî, girtiyên nexweş demildest bên berdan. Divê li ser perwerdehiya zimanê dayikê xebat bên destpêkirin. Divê ev qanûnên ji sala 1924an vir ve bûne sedemê pirsgirêkan demildest bên guherandin. Êdî divê bes hesirên dayikan birijin, xwîn bê rijandin. Divê destûra bingehîn li gorî aştiyeke mayînde û aramiyekê were guherandin.”
