Hewldana 78an a Amedrê, bi minasebeta 53yemîn salvegera darvekirina Denîz Gezmîş û hevalên wî daxuyanî da. Nûnerên Komeleyê anîn ziman ku ew ê têkoşîn û doza Denîz Gezmîş, Yusuf Aslan û Huseyîn Înan ji bîr nekin û nedin ji bîrkirin.
Hewldana 78an a Amedê bi minasebeta 6ê Gulanê, 53yemîn salvegera darvekirina Denîz, Gezmîş, Yusuf Aslan û Huseyîn Înan daxuyanî dan. Nûnerên Komeleyê di daxuyaniyê de anîn ziman ku van şoreşgerên wêrek, dildar û dilsozên jiyana azad, di oxira azadî û wekheviya gelan de, li dijî desthilata faşîst, têkoşîneke şoreşgerî ya biryardar û bêhempa, meşandin. Hewldanê di berdewama daxuyaniyê de anî ziman ku bi têkoşîna xwe ya biryardar, bi pêşbînî di nava gelan de pira têkoşîna hevpar ava kirin û wiha got: “Ji bo siberojên ronî tovê têkoşîna azadiya gelan çandin. Vî tovê azadiyê, di kesayetiya Yılmaz Güney, Ehmed Kaya û Sırrı Süreyya Önder de bû ruhê şoreşgerî yê evîndariya jiyana azad û bi rûmet. Ew tovê azadiyê li zindana amedê, li hemberî zilma Esat Oktay û generalên Derbeya Leşkerî ya 12’ê Îlonê, di kesayetiya Mazlum, Kemal û Xeyrî û Eli’yan de bû vîna ji pola û hemû hesabên fasîzmê yên ku li ser înkara gelê kurd û gelên tirkiyeyê hatibû kirin serobin kir, têk bir û veguherî têkoşîna bênavber a nîv sedsala dawî.”
Hewldanê anî ziman ku ev têkoşîna peyrewên Deniz, Hüseyin û Yusufan bi kedeke bêhempa hatiye mezinkirin û gihîştiye lûtkeya herî jor û wiha lê zêde kir: “Bi fikir û felsefeya birêz Ocalan, bi formûlasyona Banga ‘Aştî û Civaka Demokratîk’ pêşkêşî gelên tirkiyeyê, Rojhilata navîn û cihanê hatiye kirin û hemû mirovahî li dora vê banga ku hêviya cîhaneke bêşer, aştyeke mayînde û jiyana wekhev mezin kiriye, bûye xelek û piştgirî dide vê bangê. Têkoşerên bi rûmet ên peyrewên Denîz, Yusuf û Huseyînan, têkoşîna wan jî, hişmendiya ku ew bi darve kirin jî, jibîr nekirin, nedan jibîrkirin û bi têkoşîn û sekneke şoreşgerî hesab ji pergala faşîst pirsîn û dipirsin. Gotinên Deniz û hevrêyên wî, ku di kêliya dawî ya jiyana xwe de li ber sêdarê, gotibûn; “Bijî têkoşîna hevpar a gelên Kurd û tirk! Bimre Emperyalizm! Bijî têkoşîna Karker û kedkaran!,’ Hîn jî di guhê ciwanên wê demê û nifşên dûdarên wan ên vî welatî de olan didin.
Di Salvegera 53yemîn a Darvekirina wan de, em Deniz,Yusuf û Huseyînan, her wiha, di kesayetiya Mahîr û Îbrahîm’an de hemû şehîd û têkoşerên têkoşîna azadiyê bi rêzdarî bibîr tînin, bejna xwe li ber bîranînên wan ditewînin û soz didin ku, heta xewn û xeyalên wan, Sırrı Süreyya Önder, Yılmaz Güney û Ehmed Kaya’yan, ên aştiyê, civakeke demokratîk, welatekî azad û jiyana bi rûmet pêk bînin, em ê agirê azadiyê gurtir, ala têkkoşînê bilindtir bikin.”
Hewldanê herî dawî destnîşan kir ku ew ji ber ku Dildar û dilsozê azadî û wekheviyê, qasidê Aştiyê û jiyana bi rûmet Sirri Sureyya Onder ê di 3yê Gulanê de jiyana xwe jidest daye, di nava êş û xemgîniyeke mezin de ne û got: ”
Em ji malbata wî re, ji dost, heval, hogir û hezkiriyên wî û ji hemû gelên aştîxwaz re sebir û sersaxiyê dixwazin.”
Cihê wî bihuşt be.”
