Stenbol – Parlamenterê DEM Partiyê Omer Ocalan anî ziman xwedî derketina li Sirri Sureyya Onder di heman demê de xwedî derketina li banga “Aştî û Civaka Demokratîk” e û got: “Ji bo xewn û xeyalên birêz Onder pêk werin em ê aştiyê li her derî bi rêxistin bikin.”
Endamê Şandeya DEM Partiyê ya Îmraliyê Sirri Sureyya Onder piştî 18 rojên li nexweşxaneyê di 3yê Gulanê de jiyana xwe ji dest da. Sirri Sureyya Onder yek ji aktorê sereke yê pêvajoya “Banga Aştî û Civaka Demokrtîk” bû. Ji bo pêkhatina aştiyê û demokratîkkirina Tirkiyeyê bi rol û mîsyoneke girîng û serketî radibû. Her kes wî wek qasidê aştiyê û çareseriyê nas kir. Sirri Sureyya Onder ê ku ev bû 15 sal in ji bo pêkanîna aştiyê têdikoşiya, di dilê bi milyonan mirov de cih girt û ji aliyê deh hezaran kes ve hat veşartin.
DEM Partiyê ji bo parlamenterê xwe Sirri Sureyya Onder li hemû bajar û navçeyên ku DEM Partî lê bi rêxistinkirî ye şîn danî û bi deh hezaran kes serdana şîna Onder dike.
Parlamenterê DEM Partiyê yê Rihayê Omer Ocalan li cihê şînê ya Stenbolê ji ajansa me re axivî û behsa xewn û xeyalên Sirri Sureyya Onder kir.
‘Mînak û mîraseke mezin ji me re hişt’
Omer Ocalan di serî de bi gotina, “Bila serê me, serê gelê me û siyaseta Kurdan sax be” dest bi axaftina xwe kir û anî ziman ku Sirri Sureyya Onder bi sekn, zanebûn, fikir, nêrîn û tecrubeya xwe mînakekî mezin bû û wiha got: “Pêşya siyasetê û diyalogê vedikir. Zimanekî wî yê nerm û hembezkirinê hebû. Kesayetekî qedir bilind bû. Bandora wî wê her bidome. Endamê Şandeya Îmraliyê bû. Ji bo pêvajoya aştiyê bi awayek xurt bê meşandin rol û mîsyoneke mezin girtibû ser milan. Ev xebat û karê giranbûha heta dawiya jiyana xwe da ser milê xwe û berdewam kir. Mînak û mîraseke mezin ji me re hişt. Divê ev mîras ji aliyê gel û siyasetê vê bê hembezkirin û em xewn û xeyalên wî bi cih bînin. Xewn û xeyalên wî jiyaneke bi rûmet û aştiyeke bi rûmet ji bo hemû mirovan û welat bû. Tu car zimanekî mirovan biêşînê bikarnedianî her tim erênî bû. Weke ku rêzdar Abdullah Ocalan dibêjê; Sirri Sureyya Onder bi zanebûna xwe di rewşa herî xerab û neyînî de jî karibû rewşê bigûuherîne rewşeke erênî. Divê hemû civak û siyasetmedar jî wî ji xwe re referans bigirin. Ew siyasetmedarek bi ruhê civakê radibû û rûdinişt.”
‘Hemû Kurd jî anîn ba hev’
Omer Ocalan bal kişand ser xwedî derketina gel a li Sirri Sureyya Onder û got ku Sirri Sureyya Onder ne tenê cudahiyên li Tirkiyeyê, Kurd jî anîne ba hev. Omer Ocalan axaftina xwe wiha domand: “Xwedî derketineke mezin hebû hem di şexse wî û hem jî ji bo aştiyeke bi rûmet. Ew mîretaya ku ji me re hiştiye em ê mezin bikin û ji bo xewn û xeyalên wî pêk were, pêvajoya aştiyê û çareseriyê bi ser bixînin. Ji bo me referanseke mezin e. Bi deh hezaran kes xwedî li hevrê Sirri Sureyya Onder derketin. Di merasîmê de peyamên birêz Bafil Talabanî, Mesûd Barzanî û peyama Rêber Ocalan hat xwendin. Ev ji bo me tiştekî qedir bilindî ye. Hemû beşên civakê xwedî lê derket. Ev nêzikatiya wî ya aştîxwez hat hembêzkirin. Niha jî bi hezaran kes ji hemû beşên civakê tên serdana şîna wî. Divê ev nezikatî were xurtkirin. Pêdiviya civakê bi aştî, demokrasî û azadiyê heye. Sirri Sureyya Onder di nav siyaset û hunerê de ev tişt bi awayekî xurt temsîl dikir. Ji ber vê yekê ev xwedî derketina li Sirri Sureyya Onder xwedî derketina li aştiya civakî û ‘Banga Aştî û Civaka Demokratîk’ e. Di heman demê de xwedî derketina têkiliya li birêz Ocalan û birêz Onder e. Ji ber vê yekê ev xwedî derketin wisa çêbû.”
‘Em ê xewn û xeyalên birêz Onder pêk bînin’
Omer Ocalan destnîşan kir ku ji bo xewn û xeyalên Sirri Sureyya Onder pêk werin ew ê aştiyeke bi rûmet bi rêxistin bikin û axaftina xwe wiha qedand: “Ji bo xewn û xeyalên rêzdar Onder pêk were, divê em aştiyeke bi rûmet bi rêxistin bikin. Aştî ne tiştekî hêsan e. Mirov li mala xwe rûnê, siyaset raweste aştî pêş nakeve. Hewcedarî heye ku aştî jî were rêxistin kirin. Yanî tiştekî aksiyonel e. Carna şer jî aksiyoneltir e. Ji bo vê divê aştî mal bi mal were rêxistinkirin. Mal bi mal, kolan bi kolan, tax bi tax, bajar bi bajar divê em fikr û remanên Rêber Ocalan li hemû cihanê bidin naskirin û bingeha wê dagirin. Bingeha wê jî bi civak û mirovan re dibe. Birêz Sirri Sureyya Onder ev têkilî pir baş bi rê ve dibir. Birêz Ocalan jî şert û mercên siyaseta demokratîk li her aliyên Kurdistanê û Tirkiyeyê vekir. Em ê jî li vê seknê, li vê siyasetê û pêvajoyê xwedî derbikevin. Xemgînî heye lê divê em nesekinin û bimeşin. Bimeşin da ku xewn û xeyalên birêz Sirri Sureyya Onder pêk bînin. Divê em rêxistina xwe, partiya xwe û paradîgmaya rêzdar Ocalan xurt bikin.”
