Amed – Tevgera Jinên Azad (TJA) li avahiya DBPê ya Yenîşehîra Amedê starta kampanya “Bi Serokatiyê re Diyalogên Jiyaneke Azad” da. Di daxuyaniya startê de aktîvîta TJAyê Arzu Kahraman diyar kir ku êdî dê her sal 3 Gulanê wekî Roja Azadiya Rêberê Gelê Kurd Abdullah Ocalan pêşwazî bikin.
Tevgera Jinên Azad (TJA) li avahiya DBPê ya Yenîşehîrê starta kampanyaya “Bi Serokatiyê re Diyalogên Jiyaneke Azad” da. Gelek nûnerên saziyan ji gelek bajaran kom bûn. Di civînê de aktîvîstên TJAyê, endam û rêveberên DEM Partiyê, DBP, nûnerên rêxistin û saziyên Amedê û gelek jin amade bûn.
Daxuyanî ji bo şehîdên meha Gulanê deqîqeyekê bi rêzgirtinê dest pê kir.
Paşê aktîvîsta TJAyê Arzu Kahraman axivî.
Arzû Kahraman anî ziman ku 3 Gulanê daxwaza global a Rêberê Gelê Kurd Abdullah Ocalan e û wiha got: ”
Piştî banga Rêberê Gelê Kurd Abdullah Ocalan me dest bi xebatan kir. Çiqasî tevgera azadiyê gav avêtibê ji dewlet gav neavêtiye. Divê em bi çalakiyên xwe zorê li dewletê bikin ku gavan bavêje. Di pêvajoyê de gelek kar dikevê ser mile jinan.”
Arzû Kahraman da zanîn ku ji bo pêvajo pêş bikeve dest bi xebatan dikin û got: “Dewlet di şexsa jinan de politîkayên qirêj dimeşîne. Mînaka vê yekê fihûş û maddeyên hişbirinê ye. Piştî banga Rêberê Gelê Kurd Abdullah Ocalan em ê li dijî tiryakê û şerê taybet têbikoşin. Em bi yekîtiya jinan dikarin li dijî şerê taybet û wan politikayan têbikoşin. Şer hebe aştî nabe. Erka jinan diyar e. Peywîra jinan avakirina civakeke demokratîk û exlaqî ye. Ev rojên dîrokî ne. Em wekî jinen TJAyê dê her sal di Roja 3 Gulanê de, ji bo azadîya Rêberê Gelê Kurd li qadan bin. Em ê her dem azadiya Rêberê Gelê Kurd li qadan qîr bikin. Azadiya Rêbertî azadiya jin û civakê ye. Bi pêşengtiya Rêbertî tevahiya cihanê gelê Kurd nas dike. 3 Gulanê daxwaza global ya Rêberê Gelê Kurd Abdullah Ocalan e.”
Pişti axaftina Arzu Kahraman sinevêzyona ku der barê Rêberê Gelê Kurd Abdullah Ocalan de hatibû amadekirin hat temaşekirin û bername bi dawî bû.
