Amed – Rêvebera MEBYA-DERê Menîce Yenî li ser banga Rêberê Gelê Kurd Abdullah Ocalan diyar kir ku banga Abdullah Ocalan ji bo gelê Tirk û Kurd rêya çareserî û aştiyê ye.
Rêvebera MEBYA-DERê ya Amedê Menîce Yenî destnişan kir ku Kurd li dijî hemî êrîş ê gavên neyînî dîsa destê aştiyê dirêjî dewletê dikin û got: “Kurd dixwazin êdî li Tirkiyeyê aştî û demokrasî hebe. Ji bo divê dewlet gavên şênber bavêje.”
Menîce Yenî da zanîn ku piştî banga Rêberê Gelê Kurd Abdullah Ocalan a 27ê Sibatê, gelê Kurd li gor banga wî tevgerin û got: “Lê çima hîn gavek ji aliyê dewletê ve nehatiye avêtin? Li gel agirbest hatiye îlankirin jî agahiyên şehîdan tên. Ger dewlet dixwaze aştî û aramî pêk bê û Tirkiye bibe welatekî demokratîk divê dewlet ewil êrîşan bi dawî bike.”
Menîce Yenî anî ziman ku di bin navê muzakereyên aştiyê de bi top û tanqan êrîşê ciwanên Kurd dikin û wiha lê zêde kir: “Em vê helwesta dewletê qebûl nakin. Em wek saziya malbatên şehidan vê bêhiqûqiyê qebûl nakin. Em alîgirên aştî û wekhêviyê ne. Me destê aştiyê dirêjî wan kiriye em dixwazin bi hev re rûnin. Lê ew çima naxwazin? Çima gavekê navêjin? Dema em wekî MEBYA-DER diçin agahiya kuştina zarokên malbatan didin wan; malbat li hember vê agahiyê dibêjin ‘Ev çi pêvajoye hatiye destpêkirin çima zarokpn me dikujin.’ Em jî nikarin bersîvekê bidin malbatan.”
Menîce Yenî destnîşan kir ku ji bo ev pêngav bi awayeke baş berdewam bike divê Rêberê Gelê Kurd Abdullah Ocalan serbest were berdan û mafê hêviyê bikeve meriyetê. Herî dawî Menîce Yenî got ku bila ne dayîkên leşkeran û polîsan ne jî yên kurdan bigirin û êdî cenaze yên.
