Bi hinceta ku li Dêrsimê li ber stranên “Berxwedan xweş doz e” û “Herne Pêş” govend gerandine, 10 meh cezayê hepsê li siyasetmedaran hat birîn.
Partiya Wekhevî û Demokrasiyê ya Gelan (DEM Partî) di 8ê Sibata 2024an de li Dêrsimê “Meşa Mezin a Azadiyê”li dar xist. Der heqê 5 kesên tev li meşê bûn, bi îdiaya “Propagandaya rêxistinê” doz hate vekirin. Danişîna dozê hat lidarxistin. Doza Hevserokên Bajar ên berê Esma Ataş û Ozcan Gurtaş, Hevşaredara Dêrsimê Bîrsen Orhan ku li şûna wê qeyûm hatiye tayînkirin, Nazli Oz Çelîk û Ozer Laçîn, li 2yemîn Dadgeha Cezayên Giran a Dêrsimê hat lidarxistin.
Di danişînê de dozgerî heman mutalaaya xwe ya bi dîroka 25ê Adarê dubare kir û îdiaya “Bi hestên nefret û dijminatiyê, stranên ku aştiya civakî û pergala cemaweriyê xera bikin hatine gotin” kir. Dozgerî xwest bi îdiaya “propagandaya rêxistinê” ceza were birîn.
Parêzeran jî diyar kirin ku çalakiya partiya siyasî weke sûc hatiye nîşandan û daxwaza beraetê ya miwekîlên xwe kirin. Parêzeran dan zanîn ku emniyetê wergera gotinên stranên “Berxwedan xweş doz e” û “Herne Pêş” li ser Google Translateyê kirine û werger xeletin.
Her wiha parêzeran gotin ku ev stran stranên gelerî ne û di gelek şahî û çalakiyan de tên gotin.
Dadgehê cuda cuda li her 5 kesan 10 meh cezayê hepsê birî û biryara da ku ceza were taloqkirin.
