Bi boneya bîranîna qurbaniyên Komkujiya Ermeniyan, li paytexta Qahîre ya Misirê têkildarî nirxandina Rêberê Gelê Kurd Abdullah Ocalan panelek hat lidarxistin.
Desteya Niştîmanî ya Ermenî, bi boneya salvegera 110an a qirkirina Ermeniyan, li Misirê bi sernavê” Doza Ermenî di ramanê Ocalan de” panelek organîze kir. Di panelê de rewşenbîr, nivîskar, siyasetmedar amade bûn. Dr. Mihemed Rifet El Îmam û Kerem Seîd panel bi rê ve bir. Beşdaran pesna fikra Rêber Abdullah Ocalan a bi banga jiyana hevbeş û beşxandinê da û wekî yek ji bavên damezrîner ên çanda beşxandin û demokrasiyê bi nav kir.
Serokê desteyê Ermen Mazlûmiyan diyar kir ku lidarxistina panelê di vê demê de û rewşên ku herêm tê re derbas dibin girînge. Qurbaniyên Ermenî hatin bibîranîn û rewşa Kurdan hat bibîrxistin. Li aliyekî din jî rêvebirê panelê û pisporê siyasî Kerem Seîd wiha got: “Em di rojên salvegera komkujiya Ermeniyan bi destê Osmaniyan de ne û li ser asta Kurdan jî bi banga aştî ya ku birêz Abdullah Ocalan kiriye re rewşa Kurdan tê guhertin.”
Dr. Rifet El Îmam jî qirkirina Ermeniyan ji aliyê çandî û şaristanî ve girt dest. El Îmam li ser şîrovekirina Rêberê Gelê Kurd Abdullah Ocalan jî li ser fikrên Abdullah Ocalan û siyasetên “parçe bike û bi rê ve bibe “, axivî.
Herî dawî jî Kerem Seîd diyar kir ku tiştên Ermenî û Kurdan li hev kom dike ji tiştên wan cuda dike zêdetir in û got Rêber Abdullah Ocalan yek ji bangaxwazên aştiyê li Rojhilata Navîne.
