Stenbol – Perwerdekarê Tenbûrê yê Dibistana Egîdê Cimo Abdullah Yagmahan, anî ziman ku zarokên welêt ên li Stenbolê di bin qirkirina çandî de dijîn û ev tişt got: “Em dixwazin li Stenbolê ji bo zarokan gundekî ava bikin. Ji bo wê jî pêdiviya me bi piştevaniya gel û karsazan heye.”
Dibistana Egîdê Cimo, di 24ê Mijdara 2024an de weke şaxeke Akademiya MA Muzîkê, li Stenbolê avabû. Dibistana Egîdê Cimo ku perwerdehiya ziman û muzîka kurdî dide zarokan zêdetirî salekê ye xebatên xwe didomînin. Armanca wê ya bingehîn ew e ku pêşî li pişaftina zarokên kurdan ên li metrepolên Tirkiyeyê dijîn bigire. Di vê çarçoveyê de ji roja ku ava bûye heta niha ji beriya ku ji dayik bibin heta 12 saliyê gelek zarokan perwerde dike. Li dibistanê, perwerdehiya ziman, tenbûr, rîtma muzîkê û çanda muzîka kurdî tê dayin. Perwerdekarê Tenbûrê yê Dibistana Egîdê Cimo Abdullah Yagmahan der barê xebat û projeyên dibistanê de ji Ajansa Welat (AW) re axivî.
Bi ziman re fêrî muzîka kurdî jî dibin
Perwerdekar Abdullah Yagmahan, diyar kir ku wan Dibistana Egîdê Cimo taybet ji bo zarokan vekiriye û têkildarî xebatên wan ên perwerdeyê de wiha axivî: “Ji beriya dayikbûnê heta 12 saliyê zarok tên li vir perwerde dibînin. Zarokên 0-5 salî bi dê û bavên xwe re tên perwerdehiyê. Perwerdehiya ziman û muzîka kurdî dibînin. Li dibistanê akademiya zarokan a ji bo zarokên temenê wan di navbera 6-12 salan de heye. Ev zarok piştî ku di ezmûneke re derbas dibin û tên perwerdehiyê dibînin. Armanca me ew e ku zarok fêrî stranên kurdî bibin û rîtmên wê nas bikin û bîra çanda muzîka kurdî ku ji me dane jibîrkirin ji nû ve zindî bikin. Dibistan taybet ji bo zarokên li metropolên Tirkiyeyê ji dayik bûne û dijîn vebû. Perwerdehiya me ya ji bo zarokên 6-12 salî îsal dest pê kir û ji bo wan dersên mîna stranbêjiyê û zimanê kurdî, teoriya muzîka kurdî û tenbûrê tên dayîn.”
Serlêdan didomin
Di berdewama axaftina xwe de Yagmahan, destnîşan kir ku bi bi giştî 55 şagirtên wan hene û serlêdanên wan hê jî berdewam dikin û ji bo xebatên wan û serlêdanan ev agahî dan: “Aramnca me ew e ku em xwe bigihînin tevahiya navçeyên Stenbolê. Her ku diçe serlêdan jî zêde dibin. Di serdema nû de em bihevî ne ku serlêdan zêdetir bibin. Em dixwazin xwe behtir bigihînin zarokên kurd ên li metrepolan dijîn û ji muzîka kurdî bêpar in. Ji bo ku em bikaribin li hemû navçeyên Stenbolê sazî vêbikin destpêkê divê em mamosteyan perwerde bikin. Em niha hewl didin bi komeleyên kurdî re xwe bigihînin hemû navçeyên Stenbolê û bi malbatan re têkilî deynin û kesên ku nikarin werin perwerdehiyê jî bikaribin perwerdeya muzîka kurdî bidin wan.”
Ji bo zarokan projeya gund
Di dirêjiya axaftina xwe de Yagmahan, agahî da ku ji bo pêşerojê gelek projeyên wan hene û ev tişt anîn ziman: “Ji bo em bikaribin van projeyan pêk bînin pêdiviya me bi piştevaniya gel û karsazan heye. Di demên pêş de plansaziya me ya kampanyayê jî heye. Em ji bo sponsoriyê bang li karsazên kurd ên li Stenbolê dikin ku derfetên cih û aboriyê ji me re ava bikin da ku em bikaribin li hemû navçeyên Stenbolê perwerdehiya muzîka kurdî bidin zarokan. Bi vî awayî em nehêlin zarokên me di nav qirkirina çandî de tune bibin. Her wiha em dixwazin ji bo zarokan li Stenbolê gundekî ava bikin. Zarok roja înê werin û heta roja duşemê li wir bin. Zarok li wir çandiniyê bikin û temasî axê bikin. Ferî jiyana gund bibin. Ji ber ku gund jî çandeke me ye. Projeyeke me ye bi vî rengî heye. Lê ji bo ku em xebateke bi vî rengî pêk bînin piştevaniya gelê me û karsazên me yên Stenbolê hewce ye.”
Tiştên fêr bûye dide fêrkirin
Yagmahan ku ew bixwe jî ji akademiya MA Muzîkê mezûn bûye û axaftina xwe bi van gotinan bi dawî kir: “Ez li Stenbolê diçûm NÇMê lê ji aliyekî ve dixebitîm ji aliyekî ve jî perwerde didît. Lê têr nedikir. Min xwe ji vê pergalê hîs nedikir. Min hertim xwe di nava huner û muzîkê de didît. Min bihîst ku Akademiya MA muzîkê vebûye û li wir perwerdehiya muzîka kurdî didin. Di sala 2022an de min dest bi perwerdehiya MA Muzîkê kir û salek berê jî mezûn bûm. Piştî ku saziya Egîdê Cimo ava bû jî ez hatim Stenbolê û tiştên ku min hîn kiriyê ferî zarokan dikim. Dersên tenbûrê didim zarokan. Heta niha li Stenbolê saziyeke bi vî rengî nehatiyê ava kirin. Ji bo vê jî em pir bi kêfxweş in.”
