Wan– Şêniyên Wanê bertek nîşanê êrişên komên çeteyan ên li ser Bakûr û Rojhilatê Sûriyê dan û gotin: “Çawa ku gele Kurd êrişên DAIŞê bi berxwedan û serhildana xwe têk bir, dê van çeteyan jî têk bibin.”
Heyet Tehrîr el-Şamê (HTŞ) û Hêzên Sûriya Azad (OSO) di 27ê mijdarê de êrişî bajarê Helebê kir. Piştî hêzên hikûmeta Şamê, Îran û Rûsyayê vêkişiyan Heleb ji aliyê van komên çeteyan ve hat dagirkirin. Piştî ku Heleb dagir bû êrişên komên çekdar belavî qadeke berfireh bûn. Komên çeteyan ên giredayî Tirkiyeyê jî êriş birin ser herêmên Şehba û Til Rifatê. Piştî êrişên komên çekdar ên giredayî Tirkiyeyê li Şehbayê bi sedhezaran kes neçarî koçberiyê bûn. Êrişên komên çekdar 11 roj li pişt xwe hiştin û di encama êrişan de Hims Hema û Şam jî ket destê HTŞê.
Welatiyên Wanî têkildarî êrişên li ser gelên Bakûr û Rojhilatê Sûriyê û heremê ji Ajansa Welat re axivîn.
Welatî Medenî Karabacak, da zanîn ku armanca êrişên komên çeteyan tunekirina Kurdan e û wiha got: “Tirkiye piştgiriya van çeteyan dike. Rojava axa kurdane. Dema ku mijar dibe Kurd hemû kes dibin yek û dixwazin Kurdan xelas bikin. Kesên ku li hember vê zilm û zordariyê bê deng bimîne ew jî dibe şîrikê vî karî. Dive em hemû kes li hember wan êrişan dengê xwe bilind bikin û bertek nîşan bidin.”
‘Êriş bi destên Tirkiyeyê pêk tên’
Seyîtxan Yilmaz jî anî ziman ku hêzên Kurdan tu carî nahêlin komên çekdar armanca xwe pêk bînin û ev tişt got: “Ev êriş bi destên Tirkiyeyê pêk tên. Rojava axa kurdan e û em nahêlin tu çarî axa me dagir bikin. Divê em hemû ciwan hêz bidin Rojava.”
‘Armanca êrişan têkbirina Şoreşê ye’
Welatî Esed Îpek jî dest nîşan kir ku li hemberî van êrişan divê yekitî çêbibe û wiha got: “Em baş dizanin ku armanca van êrişan têk çûyîna Şoreşa Rojava ye û dagir kirina axa Kurdan e. Ev hişmendiya ku îro li bakûrê Kurdistanê êrişî vîna gelê Kurd dike, niha jî hewl dide êrişî rojavayê Kurdistanê bike. Divê li hember wan êrişan gelê Kurd demildest yekitiya xwe çêbike. Çawa ku gele Kurd êrişên DAIŞê bi berxwedan û serhildana xwe têk bir, dê van çeteyan jî têk bibe.”
‘Divê li dijî van êrişan em yekitiya xwe çêbikin’
Welatî Şexmûs Aslan jî bal kişand ser aştiyê û wiha got: “Şer, nexweşî ye û em şer naxwazin. Em dixwazin aştî çêbibe. Armanca wan eve ku hemû gelên misliman bindest bikin. Divê tu kes vê zilm û zordariyê qebûl neke û divê li hemberê van êrişan em yekitiya xwe çêbikin.”
‘Divê gelê Kurd van êrişan qebûl neke’
Necîp Erçîn jî diyar ku destên hemû dewletan di van êrişan de hene û bi domdarî wiha axivî: “Heqê tu dewletan nîne ku biçe li axa gelê Kurd û gelên din de kuştinê bike. Divê di serî de gelê Kurd van êrişan qebûl neke û bertek nîşan bide.”
