Cûma Çat ê ku di dema Derbeya Leşkerî ya 12ê Îlonê de li Zindana Amedê hatibû ragirtin, koça dawî kir. Kurê wî hunermend Kadîr Çat got ku bêyî dewlet lêborînê bixwaze ew berxwedêr yek bi yek koça dawî dikin.
Cûma Çat ê ku di Berxwedana Hîlwanê a salên 1978-79an de cih girtibû û piştî Derbeya Leşkerî ya 12ê Îlona 1980yî hate girtin û li Zindana Hejmar 5an a Amedê bi îşkenceyên giran re rû bi rû mabû. Cuma Çat di 83 saliya xwe de li Nexweşxaneya Bajar a Mêrsînê ku lê dihat tedawînkirin, ji ber krîza dil jiyana xwe ji dest da.
Cenazeyê Cuma Çat dê li Goristana Karaduvara a Mêrsînê were veşartin û şîna ji bo wî jî dê li Taxa Çay a Mêrsînê bê danîn.
Hunermendê Navenda Çanda Mezopotamyayê (NÇM) Kadîr Çat têkildarî wefata bavê xwe li ser hesabê xwe yê medyaya dijital ragihand ku bavê wî Cûma Çat yê ku di Zindana Amedê de bi îşkenceyên giran re rû bi rû mabû jiyana xwe ji dest daye.
‘Divê dewlet lêborînê bixwaze’
Kadîr Çat ji ajansa me re axivî û diyar kir ku bavê wî Cuma Çat di Zindana Amedê de şahidiya gelek îşkenceyên giran kiriye û îşkenceyê dijmirovî li wan hatiye kirin. Kadîr Çat anî ziman ku bavê wî şahidê zindî yê îşkenceya li Zindana Amedê bû û wiha got: “Temenê wî têr nekir û çavê xwe li vê dinyayê girt û bar kir. Ew li gel Kemal Pîr jî di zindanê de maye. Kedek dan, ji bo îro ked dan. Pêvajoya îro bi ked û têkoşîna wan derket holê. Her cure îşkence li wan hat kirin. Her çiqas dewletê îşkence li wan kir jî lê serî netewandin û li ber xwe dan. Her çiqas dewletê lêborînê nexwest jî lê berxwedanê dewam kir. Divê dewletê lêborîn ji mexdûrên îşkenceyê bixwesta. Lê nexwest. Bêyî dewlet lêborînê bixwaze ew berxwedêr yek bi yek koça dawî dikin. Ji niha şûn ve divê dewlet komîsyonekê ava bike û lêborînê ji malbatên kesên îşkence li wan hatiye kirin û ji berxwedêran bixwaze.”
