Di pêvajoya ku PKKê agirbest îlan kiriye de Artêşa Tirk bi SÎHAyê bombe li Garê barand. Di êrîşa hewayî de 2 endamên HPGê jiyana xwe ji dest dan.
Navenda Ragihandin û Çapemeniyê ya HPG’ê destnîşan kir ku Artêşa Tirk li dijî hêzên wan ên di pozîsyona agirbestê de, êrîş û bombebaranên xwe yên hewayî û bejahî didomîne. HPGê d azanîn ku di êrîşa hewayî ya bi SÎHAyê ku li Garê de, 2 endamên wan jiyana xwe ji dest dane. Li gorî nûçeya ANFê HPG’ê têkildarî êrîşên artêşa Tirk û bersiva HPGê ev agahî parve kir:
7ê Nîsanê di saet 11.28 û 11.29an de artêşa Tirk bi SÎHAyê bombebaran li qada Çirav a herêma Garê pêk anî û di encamê de 2 hevrêyên me yên li ser wezîfeya xwe, şehîd bûn. Agahiyên derbarê nasnameya hevrêyên me yên şehîd, wê piştre bên eşkerekirin. 8 û 9ê Nîsanê qadên Ergenê û Yekmalê yên herêma Garê 2 caran, Qada Berxwedanê ya Bêşîlî ya herêma Metînayê carekê, Qada Berxwedanê ya Girê Bahar a herêma Şehîd Delîl a Rojavayê Zapê carekê; bi giştî 4 caran bi balafirên şer hatin bombebarankirin.
Di navbera 9 – 12ê Nîsanê de Qadên Berxwedanê yên Berê Zînê, Sinînê û Lolan ên herêma Xakurkê 33 caran, qadên Kanî Sarkê, Dêreşê, Mijê, Girê Sîser, Zêvkê, Girê Kun, Girgaşê yên herêma Garê 127 caran, Qadên Berxwedanê yên Serê Metîna, Şêlazê û Bêşîlî yên herêma Metînayê 272 caran, Qadên Berxwedanê yên Girê Amediyê û Girê Bahar ên herêma Şehîd Delîl a Rojavayê Zapê 594 caran; bi giştî 1026 caran bi çekên giran, top û obusan hatin bombebarankirin.
