Amed – Serokatiya Daîreya Park û Baxçeyan a Şaredariya Bajarê Mezin a Amedê di nava salekê de nêzî 2 milyon kulîlkên demsalî yên cur bi cur çandine û park, baxçe, refûj û peyarêkên bajêr dixemilîne.
Serokatiya Daîreya Park û Baxçeyan a Şaredariya Bajarê Mezin a Amedê û Şaxên Midûriyetên Şitildank û Darçandinê yên girêdayî wê ji bo bajêr bixemilînin, qadên heşîn li bajêr zêde bikin û dar û şitilan biçînin saleke bênavber dixebitin. Serokatiya Daîreya Park û Baxçeyan li qada şitildankê, şitlên dar û kulîlkan hildiberîne û pê park, baxçe, refûj û peyarêkan dixemlîne. Daîreya Park û Baxçeyan di nava salekê de nêzî 2 milyon gulên demsalî yên zivistan û havînê ku di tesîsên wê de hatine hilberandin, li park, refûj û xaçerêyên navçeyên navendî yên Rezan, Peyas, Sûr û Bajarê Nû çandine.
Dar û kulîlkên demsalî hildiberînin
Serokatiya Daîreya Park û Baxçeyan li qadên heşîn, refuj, peyarê û xaçerêyan darên tû, çinarê, hirmî, selvî, taflan, biberiye û kulîlkên demsalî yên weke gul, binevş û kelemên ji bo xemilandinê çandine. Her wiha Serokatiya Daîreya Park û Baxçeyan û Midûriyetên Şitildank û Darçandinê yên girêdayî wê ji bo xemilandin û heşînkirina bajêr dar û kulîlkên demsalî jî hildiberînin. Her wiha bi awayekî birêkûpêk û cûrbicûr şînahiyên ku di peyzajê de têne bikaranîn jî tên çêkirin.
Parka Bajêr a Mezopotamyayê dê bêhnê bide bajêr
Serokatiya Daîreya Park û Baxçeyan a Şaredariya Bajarê Mezin a Amedê her wiha ji bo avakirina qadên hêşîn û bêhnvedanê ji bo hemwelatiyên xwe projeyên nû jî diafirîne û pêk tîne. Parka Bajêr a Mezopotamyayê ku yek ji projeya vîzyonê ya dê bêhna bajêr veke ye, dê li navçeya Peyasê, li qadeke 216 donim a li devera ku Bulvara Mezopotamya û Diclekentê hev dibirin, bê avakirin. Serokatiya Daîreya Park û Baxçeyan, di vê projeya girîng de ku ji parka klasîk derketiye, bi dirûşma “Cihê Hevdîtina Xweza û Mirovan” tevdigere û dê qada heşîn bi temamî li gorî hevsengiyên ekolojîk pêk bîne.
Di nava salekê de dora 2 milyon kulîlkan çandine
Serokê Daîreya Park û Baxçeyan Erdogan Dagdelen têkildarî xebatên xwe ji ajansa me re axivî. Erdogan Dagdelen, diyar kir ku di salekê de li qadên hêşîn ên nêzî du milyon metrekare, kesixandina daran û lênêrîna parkan hatiye kirin. Erdogan Dagdelen da zanîn ku di nava salekê de dora 2 milyon kulîlkan çandine û wiha got: “Bi hatina biharê jî niha 2 hezar daran diçînin. Çandina wan didome. Darên çinar, tû, hirmî û oyayê patromekirîne û ji bo xemilandinê em diçînin. Her wiha em niha 50 hezar gulan diçînin. Ji van me 30 hezar kirîn, 10 hezar di destê me de bûn û 10 hezar jî me bi şaxan hilberandin.”
Projeya Korûparkê jî dê bidin îhaleyê
Erdogan Dagdelen, da zanîn ku projeyên wan ên weke Parka Bajêr a Mezopotamyayê hene û wiha domand: “Park dê li qadeke dora 216 donim were çêkirin. Em dixwazin tiştên nû ku di parqên me de nînin ava bikin. Mesele em ê pirtûkxaneya servekirî, eynika avê, ji bo pêşvebirina zarokan parkên sehekî çêkin. Dora 530 donim projeya me ya Korûpark heye. Em ê wê jî îsal bidin îhaleyê bidin çêkirin. Di nava wê de darên me berê çandine hene. Em ê hin darên nû jî biçînin. Ji bo ku mirov bi rehetî bigerin, sporê bikin, bêhnê bistînin, ji bo rûberka riwekî, ji bo hevsengiya ekolojiyê û germa havînê.”
Ji bo sala 2026an dê dora 100 hezar daran biçînin
Erdogan Dagdelen, diyar kir ku ew dixwazin ewilî li cihên xizmet neçûyê an kêm çûyê xebatan bikin û ev tişt gotin: “Em ê li nava bajêr li her derê daran biçînin. Qadeke me jî heye em dixwazin ji bo sala 2026an dora 100 hezar daran lê biçînin. Ji bo darên nû biçînin xebatên xwe didomînin. Cihekî 15 donim di nava kampusa me de heye. Em ê kulîlkên aromatik ên tibî yên weke berzeling (lavanta) biçînin û di pêşerojê de em ê hilberînin jî. Her wiha em li qada xwe ya TOKIyên Seyrantepeyê jî hilberîna daran dikin. Van daran em bi awayekî bê pere belavî sazî, dezgeh û gel jî dikin.”
