Bi hezaran kes ji navenda Xelfetiyê heta nêzî gundê Amara meşiyan. Aktîvîsta TJAyê Fatma Ablay diyar kir ku divê Enqere vê îradeyê nas bike û ji bo azadiya Abdullah Ocalan gavan biavêje.
Li navçeya Xelfetî ya Rihayê bi boneya 76emîn rojbûna Rêberê Gelê Kurd Abdullah Ocalan bi dirûşmeya “Bi Rêbertiya Azad Ber bi Civaka Demokratîk ve” mihrîcana 4ê Nîsanê hate lidarxistin. Mihrîcana ku du rojan berdewam kir, bi coş û gerandina govendê bi dawî bû. Piştî mihrîcanê di pêşengtiya Tevgera Jinên Azad (TJA) de ji Parka 4ê Nîsanê ber bi gundê Amarayê ve meşiyan. Girse bi kîlometreyan meşiyan û xwe gîhandin Amarayê.
Ciwanan û jinan di meşê de pankartên “Jin Jiyan Azadî” û “Ji Rêberê me yê li Amarayê ji dayik bûye re hezar silav” ku wêneyê Rêberê Gelê Kurd Abdullah Ocalan li ser bû û pankartaîên “Li Roja Roj hilat em hêviyê şîn dikin” û “Em bi civaka Demokratîk Ber Bi Rêbertiya Azad ve” ên MED TUHAD-FEDê hatin vekirin. Her wiha di meşê de wêneyê Mûstafa Dag û Mahsûm Karaoglan ku di Nîsana 2009an de hatibûn kuştin û dowîzên “4ê Nîsanê pîroz be” , “Bê Serok jiyan nabe” , “Rêbertiya azad jiyana azad e” , “Hezar Silav ji xwediyê banga dîrokî re” û “Rêya sosyalîzmê ji azadiya jinê re derbas dibe” hatin hilgirtin.
Girseyê di meşê de her tim dirûşmên “Rojbûna te pîroz be ey Serok Apo” , “Bi Rêbertiya Azad ber bi civaka demokratîk ve” , “Jin jiyan azadî azad bike Rêbertî” , “PKK gel e gel li vir e” , “Bakur Başûr Rojhilat Apo Serokê Welat” “Bi can bi xwîn em bi te re ne ey Serok” û “Bijî Serok Apo” berz kir.
Jinan her wiha di meşê de alên TJAyê hilgirtin. Girseya ku li ser rêya derketina Xelfetiyê hate rawestandin li ber stranan govend gerand.
‘Kurdan bi cîhanê da nasîn’
Dû re aktîvîsta TJAyê Fatma Ablay a li vir axivî û diyar kir ku 4ê Nîsanê ji bo jinan û ciwanan pir girîng e û wiha got: “4ê Nîsanê felsefeya jin jiyan azadî ye. Îro em li vir ji bo Serok Apo civiyan. Civaka Kurd nehatibû nas kirin. Lê îro Kurd li cîhanê belav bûn e. 1ê Nîsanê ji bo civaka demokratîk û aştîxwaz û azadiya fizîkî ya birêz Ocalan ciwanên me li Amedê meşek dane destpêkirin. Jin û ciwan girêdayî Serokatiya xwe ne. Lazim e Enqere gavan biavêje. Ev îrade îradeya jin û ciwanan e. Lazim e Enqere îro vê îradeyê nas bike. Dayikên bi rûmet ji gelek bajaran bere xwe dane rojê. Divê şert û mercên Rêberê Gelê Kurd bên sererastkirin. Ji bo avahiyeke ku birêz Ocalan bikare lê pêvajoyê bide meşandin divê Enqere gavekê biavêje. Îro hebûn û sekna we hebûna birêz Abdullah Ocalan e.”
Wê komeke şande biçe Amara
Piştre komek ku ji nûnertiyê pêk û jin û ciwanan di nav de ji bo biçin gundê Amarayê dest meşê kirin. Tenê destûr ji vê koma nûner re hat dayîn ku biçin gund. Girseyê bi berzkirina dirûşmeyan komê ber bi gund ve rê kir.
Dê ev şande biçe gund û serdana mala Rêberê Gelê Kurd Abdullah Ocalan bike û bernameya rojbûnê li dar bixe.
